VOV4.Bahnar   – Vă vei xơđơ̆ng xơnong jang tang găn păng tơjră răh pơrang jĭ COVID-19, pơtoi răh tơdrong jang mŭk drăm, khei năr âu ki, dêh char Gia Lai hlôi đei lơ trong jang vei xơđơ̆ng vih vơ̆t chơ tơmam drăm, mă kăl noh tĕch răt đơ̆ng teh đak đe tơ̆ 'Măng xơlam Apŭng plenh teh Lệ Thanh, apŭng Đức Cơ.

Đơ̆ng blŭng xơnăm truh dang ei, tơdrong tĕch răt tơmam drăm găn trong 'Măng xơlam Apŭng plenh teh Lệ Thanh (apŭng Đức Cơ, dêh char Gia Lai) hơnơ̆ng đei vei xơđơ̆ng, đei jơnei pơhlom 90 trĭu đôlar, tŏk 78% pơtêng hăm khei năr âu xơnăm 2020. Lơ̆m noh, tơdrong tĕch răt tơmam drăm (mă hăt noh tơmam choh pơtăm) đei 62 trĭu đôlar, tŏk 2,5 'măng. Ƀok Hoàng Lương Quang – Kơdră Anih jang Haih kuan 'Măng xơlam Apŭng plenh teh Lệ Thanh – Anih tơm Haih kuan Gia Lai - Kon Tum ăn tơbăt, khul jang haih kuan dêh char Gia Lai hlôi jang hadoi kơjăp hăm khul jang y tê̆, khul linh vei xơlam teh jang kơjăp pơkăp tang găn păng tơjră pơrang jĭ  COVID-19 tơ̆ anih hơtŏk tơmam drăm.

Lan chih păng pơre nơ̆r