VOV4.Bahnar – Lơ̆m tơdrong jang kech mang kơ dĭh, Kdră chĕp pơgơ̆r Tĕh đak Hồ Chí Minh hlôi ‘măn ăn lơ tơdrong gĭt kăl hăm khŭl Kŏng nhân păng Năr Apŭng plĕnh tĕh Jang năr 1/5. Lơ̆m khei ‘năr tochă trong dŏng tĕh đak, năr 1/5/1920, Nguyễn Ái Quốc hlôi vang năm mit tĭnh tơbăt Năr Tơdrong jang apŭng plĕnh tĕh atŭm hăm Khŭl đảng viên Xã hội Phalăng păng vang pơma dơnŭh athei pơdơ̆h ăn bơngai năm tĕh đak anai. Năr 1/5/1924, kiơ̆ nơ̆r krao hơvơn đơ̆ng Khŭl kơdră chĕp pơgơ̆r Đảng pơlei tơm Moscow păng Khŭl kơdră chĕp pơgơ̆r kơ Apŭng plĕnh tĕh Kŏng san, Nguyễn Ái Quốc vang năm păng iung pơma lơ̆m ‘măng pơgơ̆r pơm lê̆h tơbăt Năr Apŭng plĕnh tĕh jang 1/5.

 – Kơtă đơ̆ng rŏng kơ Kach mạng Khei 8 đei jơnei, teh đak đei iŏk jơnei rơngei, năr 18/2/1946, Kơdră Hô Chĭ Minh hlôi kĭ Pơkăp găh dôm 'năr pơdơh Têt, tơbăt kơ hnưr erih păng lêh kiơ̆ khôi juăt, lơ̆m noh tơchơ̆t: Năr 1/5 jing minh lơ̆m dôm 'năr Lêh tih păng bơngai pơm jang lơ̆m jâ̆p teh đak đei pơdơh minh năr jang mă oei đei xa jên khei. Jô̆ đơ̆ng noh, năr 1/5 đei lăng jing minh lơ̆m dôm 'năr lêh tơm rim xơnăm kơ Teh đak bơ̆n. Năr 29/4/1946, Ƀok Kơdră Hô Chĭ Minh kĭ Pơkăp kơsô̆ 56 tơchơ̆t bơngai pơm jang đei xa jên khei lơ̆m 'năr pơdơh lêh Apŭng plenh teh Pơm jang (1/5). Năr 1/5/1946, 'măng mă blŭng lơ̆m hnưr erih teh đak bơ̆n, 'năr Apŭng plenh teh pơm jang năr 1/5 đei pơgơ̆r tơbăt mit tinh kăp gĭt tơ̆ Hà Nội, hăm tơdrong vang akŏm đơ̆ng 20 rơbăn bơngai pơm jang. 

Lan – Zưt chih păng pơre nơ̆r