VOV4.Bahnar - Drung kơsơ̆ năr 12/4, ƀok Chử Xuân Dũng, Kơ iĕng Kơdră chĕp pơgơ̆r Dơnŏ anĭh vei lăng kon pơlei kơ pơlei tơm Hà Nội pơm tơm hop akŏm trư̆k tuyên hăm rim kuân, apŭng, phương, tơring vă hơnơ̆ng tơlĕch jang rim trong jang tang găn jĭ Covid-19 adoi nhen pơrang jĭ jơ̆ng ti ƀơ̆r ... Kiơ̆ đơ̆ng Dơnŏ anĭh vei lăng jang pơgang Hà Nội tơbăt, trŭh dang ei hlôi yak hlŏh 56 năr pơlei tơm pă đei ƀô̆h bơngai ayơ tơpŏh jĭ. Pơlei tơm hlôi pơgơ̆r ƀet pơgang vaccine tang găn Covid-19 ăn 8.047 ‘nu bơngai, lơ hlŏh nơ̆r tơlĕch hơdrol. Tơdrong ƀet pơgang vaccine tang găn jĭ Covid-19 lơ̆m ‘măng mă 2 (hlŏh 50.000 kơ liêu) gô ƀet ăn hlŏh 26.000 ‘nu ƀok thây pơgang păng hlŏh 70.000 ‘nu bơngai bơ̆ jang dăr lăng hơlen tơdrong jĭ Covid-19 păng tơchĕng hơdrol lơ̆m sơnăm au Hà Nội gô ƀet vaccine tang găn Covid-19 ăn 350.000 ‘nu bơngai. Đei ƀơm trŭh jĭ jơ̆ng ti ƀơ̆r, ƀok Chử Xuân Dũng athei rim tơring kăl lăng kơ jăp jang tang găn jĭ jơ̆ng ti ƀơ̆r; athei rim kuân, phương hơnơ̆ng tơroi tơbăt vă kon pơlei băt hơdăh rim trong jang tang găn jĭ.

Tơblơ̆ nơ̆r: Amazưt