VOV4.Bahnar – Kơsơ̆ năr 5/5, ƀok Chu Ngọc Anh, Kơdră Anih vei lăng kon pơlei plei tơm Ha Nô̆i hlôi năm hơlen tơdrong jang tang găn păng tơjră pơrang jĭ tơ̆ Hnam pơgang Nhiê̆t đơ̆ng Trung ương 2 (apŭng Đông Anh) đơ̆ng rŏng kơ đei ƀak sih kơ Hnam pơgang âu ƀơm jĭ Sar-Cov-2. Ƀok Chu Ngọc Anh ăn tơbăt, plei tơm hlôi drơ̆ng nơ̆r hăm Anih tơm Y tê̆ pơgăn ưh ăn mơ̆t lĕch tơ̆ Hnam pơgang Nhiê̆t đơ̆i Trung ương 2 âu. Xơnong jang tơnăp noh tenh kuăng hơmet pơrang jĭ, vei xơđơ̆ng ăn khul thây pơgang, ƀak sih jang tơjră jĭ. 'Nâu duh jing trong vă tang găn tơpoh hăm pơrang jĭ lơ̆m tơpôl. Kiơ̆ kơdră kơpal kơ plei tơm Ha Nô̆i, hăm tơdrong hơbuh hli đơ̆ng pơrang jĭ, hăm tơdrong tơplih yŏng 'nao, rim khul jang tơjră pơrang jĭ nhen ƀak sih, bơngai jang y tê̆ hlôi đei bơngai ƀơm xơmach Sar-Cov-2. Ƀok Chu Ngọc Anh pơkăl hơlen tôm hơnăn bơngai mơ̆t lĕch tơ̆ hnam pơgang lơ̆m 10 năr kơ âu vă băt hơdăh, iŏk hơlen pham, tenh kuăng hơmet tơring hơbuh pơrang jĭ âu.

Lan chih păng pơre nơ̆r