VOV4.Bahnar - 6 khei blŭng sơ năm 2021, Dak Lak đei truh 650 ‘măng kŏh phă bri păng tơ gar iŏk tĕh bri, iŏk đei vă jê̆ 1 puăt kơ sô̆ tơ drong pơm glăi luơ̆t vei lăng păng atŏk tơ iung bri lơ̆m tĕh đak. ‘Nâu jĭ tơ drong ưh hơ iă kiơ, ăn ƀôh tơ drong kŏh phă bri tơ̆ Dak Lak oei tôch dêh.

Tơ drong kŏh phă bri, tơ gar iŏk tĕh bri tơ̆ Dak Lak oei đei tôch dêh

Kiơ̆ kơ sô̆ chih jô̆ đơ̆ng Anih vei lăng bri ‘long dêh char Dak Lak, lơ̆m 6 khei blŭng sơ năm, lơ̆m dêh char đei 590 tơ drong kŏh phă bri păng 60 tơ drong tơ gar iŏk tĕh bri glăi luơ̆t, hăm bri ‘long đei kŏh phă păng tĕh bri đei tơ gar iŏk truh 207ha.

Lơ̆m nŏh, dôm anih jang kơ pal sek tơ lang đei 390 tơ drong, thu iŏk vă jê̆ 260m3 ‘long lơ kơ loăi, rôp 252 tŏ gre, thu iŏk jên ăn tĕh đak vă jê̆ 3 ti. Kăl pơ ma ‘nŏh, đei hlŏh 70% kơ sô̆ tơ drong kŏh phă bri ‘long lơ̆m 6 khei âu ki tơ̆ Dak Lak đei tơ̆ apŭng Krông Bông, 1 tơ ring oei đei tơ drong kŏh phă bri ‘long tôch dêh, tŏk bŏk đei dôm anih jang kơ pal kơ dêh char akŏm jơ hngâm sek tơ lang.

Dơ̆ng: Tơ blơ̆