VOV4.Bahnar – Đơ̆ng blŭng khei 11/2021 truh dang ei, dêh char Gia Lai hlôi ƀôh băt minh ƀar anih hơbuh pơrang jĭ COVID-19 tơ̆ dôm pơlei pơla kon kông tơ̆ plei tơm Pleiku păng apŭng Đăk Đoa. Tơdrong tơpoh đei xơkơ̆t tơrĕk truh tơdrong akŏm bôl lơ lơ̆m pơlei pơla, mă hăt noh tơdrong pơjôk groong ƀŭ.

          Lơ̆m khei năr âu, xăh Hà Bầu, apŭng Đăk Đoa jing anih hơbuh pơrang jĭ hli hlơt kơ dêh char Gia Lai. Lơ̆m hloh minh giĕng kơ âu, tơring băt đei jê̆ 200 'nu bơngai ƀơm COVID-19 tơ̆ 6 pơlei kon kông. Lơ̆m noh găh pơlei Nú đei 88 'nu ƀơm jĭ. Lơ bơngai ƀơm F0 âu đei xơkơ̆t hlôi năm akŏm et xa ăh 'măng grông ƀŭ đe lôch lơ̆m 2 năr 10 păng 11/11. Yă Dương Thị Kim Quy – Phŏ Kơdră Anih vei lăng kon pơlei xăh Hà Bầu, apŭng Đăk Đoa ăn tơbăt: “Jơnŭm pơgơ̆r đei pơjao ăn khul COVID-19 tơ̆ pơlei pơla, tang găn akŏm lơ bơngai; bơngai tơ̆ 'nguaih pơlei pơla, xăh noh chih hơnăn. Pơtih, bơngai Yuăn ƀôh pơrang jĭ hơbuh hli thoi noh đe truh xoh hlôt nhang đĕch, đang kơ noh chôt vih. Mă lei kon pơlei kon kông tơ̆ âu noh pha, athei tơ oei rôp ti pơma dơnuh dih băl, xŏng xa et minh kơli tơdrô 'mơ̆i. Noh tơnap tap lơ̆m tơdrong tang găn păng tơjră pơrang jĭ"

Oei tơ̆ plei tơm Pleiku, dang ei pơđĭ 3 pơlei Jrai adoi ƀơm pơkăp pơvei kơyuơ ƀôh kơ hrĕng 'nu bơngai ƀơm COVID-19, duh tơrĕk truh anih groong ƀŭ âu. Ƀok Rơ Châm Thót – Ƀĭ thư chi ƀô̆ pơlei Ốp (phương Hoa Lư – plei tơm Pleiku) ăn tơbăt, tơdrong pơgơ̆r groong ƀŭ thoi juăt jue lơ̆m khei năr pơrang jĭ tŏk bŏk oei hơbuh hli pơm ăn pơlei đei 77 'nu bơngai ƀơm jĭ: “Ăh đei bơngai lôch hơchăng noh kon pơlei năm truh pơjôk, đe xư đei tơm xik noh 'nhăk pơtruh vang glơng ol xơ 'ngon; nhŭng ier noh 'nhŏng oh kiơ̆ kơ tơdrong kĕ đei kơ unh hnam po. Lơ noh ier, nhŭng noh hăp tih jat; atŭm tơ oei et xa. Pơgơ̆r lơ̆m 2 truh 3 năr, 'năr mă 4 noh pơtơm tôch, pơrăm truh jơhngơ̆m jăn, mŭk drăm. Dang ei noh duh oei vei xơđơ̆ng thoi ăi, tam mă xut lê̆ ôh”.

          Dang ei, tơ̆ Gia Lai đei pơhlom 1000 pơlei kon kông tơ̆ 17 apŭng, thĭ xăh, plei tơm. Hăm kon pơlei kon kông tơ̆ Tây Nguyên, đon bơnôh tơguăt kon pơlei đei tơƀôh hơdăh lơ̆m tôm tơdrong pơm jang, tơdrong erih joh ayŏ. Mă lei lơ̆m khei năr pơrang jĭ COVID-19 oei hơbuh hli, âu jing hê̆ minh tơdrong pơgăn hăm tơdrong jang tang găn păng tơjră pơrang jĭ kơ dêh char.

          Ƀok Lê Văn Quang – Kơdră Anih vei lăng kon pơlei phương Hoa Lư, plei tơm Pleiku ăn tơbăt, vă hơmet tơdrong mă âu, kăl đei tơdrong iung jang đơ̆ng tôm anih jang chĭnh trĭ, mă kăl noh athei chĕp vei xơnong jang kơ dôm bơngai đei kơdrưh lơ̆m pơlei pơla, chă tơroi pơtho kon pơlei athei drơ̆ng minh, pơm kiơ̆ tơnăp dôm trong tang găn păng tơjră pơrang jĭ: “Lơ̆m khei năr pơkăp pơvei, tơ̆ pơlei Ốp đei hnam ưh kơ 'lơ̆ng hơkâu. Nhôn hlôi akŏm tôm anih jang chĭnh trĭ vă tơroi ăn unh hnam đei bơngai lôch hơchăng băt, xơkơ̆t đon kơchĕng: ưh đei pơgơ̆r tơ̆ hnam. Đơ̆ng rŏng unh hnam drơ̆ng kiơ̆ tơroi tơbăt, noh hơmet xir hơlŭng hơmŏ, 'nhăk bơngai hiong vih noh ƀŭ hloi, ưh đei akŏm lơ bơngai, tang găn tơdrong pơgơ̆r groong ƀŭ kiơ̆ khôi juăt xo kơ kon pơlei”.

Lan chih păng pơre nơ̆r