VOV4.Bahnar - Kơ iĕng Kơdră chĕp pơgơ̆r Dơnŏ anĭh tơm vei lăng jang pơgang Nguyễn Trường Sơn ‘nao ăn asong pơlei tơm Hồ Chí Minh jang pơlong năng ăn oei hơdrô̆ F0 tơ̆ hnam kơ dĭh, nhen găh tơdrong ăn oei hơdrô̆ hăm F1. Mă hơdăh, găh ăn oei hơdrô̆ F1, hăm dôm bơngai oei tơ̆ tơring hơmơt tơpŏh kơtang ư̆h kơ đei tôm rơvơn kiơ̆ trong pơkăp đơ̆ng Dơnŏ anih tơm vei lăng jang pơgang vă ăn oei hơdrô̆ tơ̆ hnam kơ dĭh (đei bơngai F0 tơ̆ hnam lơ̆m tơring đei jĭ nhen hnam ăn mơng oei, koeng dơnuh, hnam oei kơ hŏk tro, sinh viên ......) ‘nŏh chơ ba năm oei hơdrô̆ akŏm,khăm hơlen RT-PCR năr mă 7 tơplĭh ăn năr mă 14 hơdrol au ki, tơdăh ư̆h kơ đei ƀô̆h tơpŏh sơmach jĭ lei chơ ba ăn oei hơdrô̆ lơ̆m ŭnh hnam kơ dĭh. Găh ăn oei hơdrô̆, ming hơmet F0: hăm bơngai ư̆h kơ đei ƀô̆h jĭ tơdrong jĭ hơbŭh tŏk bŏk ming hơmet jĭ jăn tơ̆ hnam pơgang, tơdăh khăm hơlen RT-PCR năr mă 10 pă đei ƀô̆h tơpŏh sơmach jĭ dăh mă oei đei sơmach jĭ mă lei đĭ pă gan kơtang, pă kĕ vă tơpŏh ăn bơngai anai lei chơ ba ăn oei hơdrô̆ lơ̆m hnam tơdăh đei sơđơ̆ng tang găn kĕ tơpŏh. Tơlĕch jang pơlong năng ăn oei hơdrô̆ F0 tơ̆ hnam hăm bơngai ư̆h kơ đei ƀô̆h jĭ au to. Dơnŏ anĭh vei lăng jang pơgang pơlei tơm Hồ Chí Minh pơma hơdăh, hnam pơgang tơring kăl ăn ƀok thây pơgang vei lăng năng tông jơhngơ̆m jăn rim năr hăm dôm bơngai F0 ăn oei hơdrô̆ tơ̆ hnam; iung jang tơbăt kơtơ̆ng kang kăl hăm dôm bơngai jĭ đei ƀô̆h jĭ, tĕnh koăng chơ ming hơmet tơ̆ hnam pơgnag hloi.

Tơblơ̆ nơ̆r: Amazưt