VOV4.Bahnar - Năr 26/3, ‘Măng hop akŏm mă 18, Jơnŭm vei lăng kon pơlei dêh char Lâm Đồng jăl IX hlôi pơdrơ̆ng kiơ̆ Tơdrong tơchơ̆t trong jang tơmơ̆t jên jang ming man trong gre rĕnh Tân Phú (dêh char Đồng Nai) – Bảo Lộc (dêh char Lâm Đồng) hăm kon jên tơmơ̆t jang ‘măng mă I ‘nŏh 16.408 ti hlak jên. Tơdrong vă au trong atăih 67km, lơ̆m au đei 11km trong yak hlŏh apŭng Tân Phú kơ dêh char Đồng Nai, 56km ‘nŏh găn hlŏh rim apŭng Đạ Huoai, Đạ Tẻh, Bảo Lâm păng pơlei tơm Bảo Lộc kơ dêh char Lâm Đồng. Trong au să 22m hăm 4 pang trong gre ôtô, 2 trong ăn gre dơ̆ng hăt hot. Tơdrong vă jang au đei iung jang 2 hơyŭh, lơ̆m au ‘măng blŭng đei ming man đơ̆ng sơnăm 2021 trŭh sơnăm 2025. Akŏp kon jên tơmơ̆t jang ‘nŏh 16.408 ti hlak jên, lơ̆m au jên đơ̆ng Tĕh đak ‘nŏh dang 6.500 ti hlak jên, pă dôm yơ ‘nŏh jên hơvơn.  

Tơblơ̆ nơ̆r: Amazưt