VOV4.Bahnar - Kiơ̆ đơ̆ng Dơnŏ anĭh tơm vei lăng Hnam trương pơtho pơhrăm tơbăt, jô̆ trŭh 5 jơ kơsơ̆ năr 5/9, đei hlŏh 385 ‘nu hŏk tro hơmet ming tơdrong ‘mĕh vă mơ̆t hŏk hnam trương anai, tơmơ̆t 45% lơ̆m akŏp hŏk tro hlôi apĭnh xek tơmơ̆t hŏk đăi hŏk ‘moi kiơ̆ pơtôch ‘măng pơlong lĕch ‘măng khoă jăl pêng sơnăm 2021 tŏk hlŏh 3% pơtêng hăm sơnăm sơ̆. Măt bơngai chĭh hơnăn apĭnh mơ̆t hŏk hơdrol hơmet ming ‘nŏh 3 trĭu 800.000 tơdrong ‘mĕh vă, jô̆ hơtŏ lơ̆m 1 hŏk tro apĭnh ‘mĕh vă mơ̆t hŏk 4,8 tơdrong ‘mĕh vă. Măt bơngai chĭh hơnăn apĭnh xek tơmơ̆t hŏk lăp đơ̆ng rŏng hơmet ming ‘nŏh hlŏh 3 trŭh 900.000 tơdrong 'mĕh vă, tŏk dơ̆ng hlŏh 84.000 tơdrong ‘mĕh vă, jô̆ hơtŏ mĭnh hŏk tro chĭh hơnăn apĭnh 4,9 tơdrong ‘mĕh vă. Dơnŏ anĭh tơm vei lăng hnam trương pơtho pơhrăm jei tơbăt, đei hlŏh 78.000 ‘nu hŏk tro drơ̆ng nơ̆r mơ̆t hŏk mă rim hnam trương hlôi chĭh tơmơ̆t lơ̆m kmăi, tŏk dang 5.000 pơtêng hăm sơnăm sơ̆. Kiơ̆ jơ ‘năr krao mơ̆t hŏk đơ̆ng Dơnŏ anĭh tơm vei lăng hnam trương pơtho pơhrăm, jô̆ đơ̆ng năr 13/9 trŭh 5 jơ kơsơ̆ năr 15/9, rim hnam trương hơlen lăng ‘măng tơmơ̆t mă 1. Hơdrol 5 jơ kơsơ̆ năr 16/9, rim hnam trương tơbăt hơdăh hơnăn hŏk tro đei hơnăn mơ̆t hŏk ‘măng mă 1.

Tơblơ̆ nơ̆r: Amazưt