VOV4.Bahnar - Vă sơđơ̆ng pơtrŭh ŭnh hơyŭh tơgŭm ăn ‘măng pơlong lĕch ‘măng khoă jăl pêng sơnăm hŏk 2021 trŭh au kơnh, Hnam kmăi ŭnh hơyŭh Dak Nông hlôi pơjing trong jang hơmet ăn ŭnh hơyŭh, sơđơ̆ng pơtrŭh ŭnh hơyŭh ăn rim hơnĭh pơlong. ‘Măng pơlong lĕch ‘măng khoă jăl pêng sơnăm 2021, dêh char Dak Nông đei 7.000 ‘nu hŏk tro chĭh hơnăn vang năm pơlong tơ̆ 18 Hơnĭh pơlong.

Vă sơđơ̆ng pơtrŭh ŭnh hơyŭh ăn ‘măng pơlong, Kŏng ty ŭnh hơyŭh Dak Nông tơbăt, gô ư̆h kơ kŭp ŭnh hơyŭh vă ming hơmet nhen hlôi pơ prŏ hơdrol lơ̆m dôm năr pơgơ̆r pơlong. ‘Ngoăih kơ ‘nŏh, kŏng ty pơrô̆ athei rim hơnĭh jang ŭnh hơyŭh năm jang hơdoi hloi hăm rim hnam trương đei pơgơ̆r pơlong păng hơnĭh bơ̆ jang kơ Khŭl kơdră jang tơgŭm ăn ‘măng pơlong vă jang hơdoi dăr lăng hơlen găh tơlei ŭnh hơyŭh au to vă đei ƀô̆h hrôih găh hư răm, tơbăt ăn hnam trương chă tơplĭh dôm tơlei, jơ ŭnh hơyŭh pă ‘lơ̆ng, pă sơđơ̆ng. Adoi, tơ̆ rim hơnĭh pơgơ̆r pơlong, hơnĭh jang ŭnh hơyŭh ăn bơngai jang kơ hơnĭh au oei tơ̆ nŏh hloi păng rim khŭl jang tơ̆ rim hơnĭh biên ap, vă tơtom hơmet pơ ‘lơ̆ng tơdăh đei tơdrong sar bar, tĕnh koăng pơtrŭh ŭnh hơyŭh ăn hơnĭh pơlong tĕnh koăng hlŏh.

Tơblơ̆ nơ̆r: Amazưt