VOV4.Bahnar - Hnam ƀlŏk hơ dơ̆r kơ kơ nhap ƀok Đại tướng Võ Nguyên Giáp tơ̆ thôn An Xá, xăh Lộc Thủy apŭng Lệ Thủy đơ̆ng lơ sơ năm kơ âu jĭ hơ nih tôch kơ tơ jê̆ păng ‘lơ̆ng hăm kon pơ lei , khŭl linh lơ̆m teh đak. Hơ nih ‘nâu ling lang sơng iŏk dôm tơ drong ‘mêm ‘lơ̆ng đơ̆ng kon pơ lei jơ̆p tơ ring lơ̆m teh đak năm hơ pong, ƀlŏk hơ dơ̆r kơ nhap ƀok Đại tướng gĭt kăl kơ hơ drĕch hơ drŭng.

Năm klĕch ‘măng jang klok kơ mâu pơm đunh đơ̆ng sơ̆, ‘moi kiơ̆ trong năm mơ̆t tơ̆ hnam nhap ƀok Đại tướng Võ Nguyên Giáp, ƀôh tom măt ‘noh jĭ ƀrơ̆ch tơm ‘long hla che jing ‘lơ̆ng, đei kăt toăng tôch tơ păt. Hnam so tơ ter đak krong Kiến Giang găh thôn An Xá, xăh Lộc Thủy, apŭng Lệ Thủy, tơ klep hăm lơ tơ drong hơ iă đơ̆ng oei ‘lơ̆p sơ̆ kơ Đại tướng. Hơ drol sơ̆, lơ̆m khei ‘năr tơ blah vang, hnam âu hlôi đei đe soh hŭt ŭnh sa pơ đĭ. Sơ năm 1977, kiơ̆ tơ drong ‘meh vă đơ̆ng ŭnh hnam nhap ƀok Đại tướng, hnam đei pơm ming dơ̆ng ‘moi kiơ̆ hơ nă so nhen hnam hơ drol sơ̆. Hnam pơ bŭng gŏch pĕng gia tơ̆ hơ năp vă pĕng tŏ ‘mi. Tơ̆ lăm hnam đei hơ met tôch hơ iă, lăm tơm ‘noh pơm kơ ƀang soi ăn kơ yă ƀok Đại tướng Võ Nguyên Giáp. Tơ̆ lăm păh to ming hom tih tăh dôm tơ mam oei đei kơ ŭnh hnam nhap ƀok. Tơ̆ ‘ngoăih hang lơng đei 2 tŏ kơ ƀang vă sơng tơ moi. Tăp dăr hnam oei hơ tol lơ rup đe ƀok sơ̆. Ƀok Võ Đại Hàm, bơ ngai krao Đại tướng jĭ ƀok, kon sâu lơ̆m hơ drĕch hơ drŭng đe sư sơ năm ‘nâu đĭ vă jê̆ 80 sơ năm bơ̆ih, jĭ bơ ngai vei lăng Hnam ƀlŏk hơ dơ̆r, chă soh plang nhang ƀơ̆t kơ ƀang soi kơ nhap ƀok Đại tướng tơ băt:

        “Hnam pơm kơ pal teh đe ƀok yă sơ̆, kŭm pơm hăm tơ̆r ‘long nhen thoi ‘nâu. Ƀơ̆t Phalăng tơ blăh iŏk đơ̆ng Quảng Bình, đa hao ca nô đơ̆ng Đồng Hới tŏk kiơ̆ đak krong Kiến Giang tơ blăh ƀa trui păng soh hŭt hnam ‘nâu. Đơ̆ng rŏng kơ tơ blăh rơ ngei, apŭng pơm ming dơ̆ng hnam ‘nâu, rim bơ ngai hơ pơi ‘meh Đại tướng mưh vih tơ̆ pơ lei đei hơ nih oei pơ dơh.”

Hnam ƀlŏk hơ dơ̆r kơ nhap ƀok Đại tướng Võ Nguyên Giáp ƀơ̆t tơ ter đak krong Kiến Giang

        Tơ drong vei lăng Hnam ƀlŏk hơ dơ̆r âu yua đơ̆ng ŭnh hnam ƀok Võ Đại Hàm păng yă Trần Thị Vân, jĭ kon sâu lơ̆m drĕch Võ iŏk vei lăng. Kon pơ lei păng khŭl linh lơ̆m teh đak mưh truh hơ pong đei sơng tôch hơ iă păng chă mơ̆ng dơ̆ng tơ drong tơ roi kơ nhap ƀok Đại tướng oei ‘lơ̆p sơ̆. Mă đơ̆ng lơ ‘măng năm ngôi tơ̆ hnam âu bơ̆ih ră, mă lei mưh rim ‘măng yak mơ̆t ƀơ̆t ‘măng hnam, linh so Phan Thế Vinh oei hơ nơ̆ng ƀôh chhưu lơ̆m jơ hngơ̆m. Kơ lih yua kơ dôm ‘măng nhap ƀok Đại tướng ƀrŏk ngôi tơ̆ pơ lei, ƀok jĭ 1 lơ̆m dôm ‘nu bơ ngai chơt hơ iă đei tơ ƀơ̆p, pơ ma dơ nuh hăm nhap ƀok Đại tướng. Linh so Phan Thế Vinh, tơ̆ xăh Lộc Thủy, apŭng Lệ Thủy tơ roi:

       "Đei tơ drong kiơ ‘noh pơm tơ iung jơ hngơ̆m ĭnh ‘noh jĭ mưh rim  sơ năm truh năr mih Giáp lôch dăh truh năr tơ băt năr rơ neh kơ mih Giáp kŭm nhen dôm năr lêh ĭnh hơ nơ̆ng truh ngôi tơ̆ âu păng ƀlŏk kơ mih. Ĭnh tơ chĕng nhen thoi mih Giáp oei arih vih ngôi tơ̆ hnam âu”.

Hnam ƀlŏk hơ dơ̆r kơ nhap ƀok Đại tướng Võ Nguyên Giáp

        Tơ drong arih oei ‘lơ̆p sơ̆ kơ nhap ƀok Đại tướng tơ klep kơ jăp đak krong pơ lei pơ la, đak krong Kiến Giang ro huơ huĕr ‘lơ̆ng hơ iă. Yă Ngô Thị Bảy, oei tơ̆ thôn An Xá, xăh Lộc Thủy, apŭng Lệ Thủy tơ roi, dôm ‘măng nhap ƀok Đại tướng ƀrŏk ngôi tơ̆ hnam, kon pơ lei lĕch sơng tôch kơ lơ. Tơ̆ gơ măng, tơ ring, kon pơ lei pơ gơ̆r hơ ri pơ chơt ƀơ̆t hơ năp cham Hnam tơ băt. Yă Bảy kŭm hăm khŭl hơ ri hơ soang lơ̆m xăh Lộc Thủy chă hơ ri lơ la boa hơ ri hò khoan tôch hơ iă. Yă Bảy ƀlŏk dơ̆ng, ƀơ̆t doh sơ̆, Đại tướng ngôi ƀơ̆t hang lơng hnam, tăp dăr ‘noh hnam dơ nŏ păng mih ma duch nă rông ƀôt, tap ti mơ̆ng ƀai hơ ri hò khoan, lơ̆m ŭnh hnam, rông ƀôt tôch kơ hơ iă:

        “‘Măng mă blŭng tơ ƀơ̆p Đại tướng,kơ plăh ƀơ̆t doh sơ̆ hơ iă hai, tơ tơ̆ hai ƀơ̆t mih truh rôp ti. Ĭnh ƀơ̆t doh sơ̆ oei ‘lơ̆p đĕch, pơ ma:“Bơ nê kơ ih mih”, rôp ti mih ĭnh tôch hơ iă ha ƀơ̆r pơ ma “ Ti mih rơ moăn dêh, oei ti mon ‘noh hơ răng” đang kơ ‘noh ƀôh mih hiĕk. Muh măt sư nhen hơ lăng rơ hâu lăng ưh kơ đei nhen thoi ƀok yŏng mă nhen thoi 1 ‘nu bơ ngai ƀă, bơ ngai ƀok kơ pơ lei pơ la, tôch kơ iơ̆m păng ‘mêm kơ kon pơ lei.”

Phŏ Kơ dră teh đak Võ Thị Ánh Xuân soh nhang, ƀlŏk hơ dơ̆r kơ nhap ƀok Đại tướng Võ Nguyên Giáp tơ̆ Hnam ƀlŏk hơ dơ̆r

       Hnam tơ ter đak krong Kiến Giang đei lơ tơ drong hơ iă, tơ klep kơ jăp đơ̆ng chăl oei ‘lơ̆p ding truh ƀơ̆t Đại tướng kră jơ hngơ̆m jăn pă jăng. Dang ei, Hnam ƀlŏk hơ dơ̆r kơ Đại tướng Võ Nguyên Giáp jing 1 hơ nih tôch kơ joăt hăm lơ kon pơ lei tơ̆ jơ̆p tơ ring lơ̆m teh đak. Kơ sâp hla ar chih răk nơ̆r tơ băt ming tŏk bŏk hnam âu oei ƀôh lơ chư chih tơ ƀôh jơ hngơ̆m đon lui yom, ‘mêm kơ eng đơ̆ng kon pơ lei, khŭl linh lơ̆m teh đak păng bôl buăl apŭng plĕnh teh mưh năm ngôi, mơ̆t lăng tơ̆ Hnam ƀlŏk hơ dơ̆r kơ Đại tướng Võ Nguyên Giáp.

Thuem: Tơ blơ̆