VOV4.Bahnar - Kơ sơ̆ 14.10, tơ̆ Hnam Kuô̆k hô̆i, Kơ dră Kuô̆k hô̆i Vương Đình Huệ păng Bí thư Khul chĕp kơ̆l Đảng kơ Khul kơ dră tĕh đak, Thủ tướng Phạm Minh Chính pơ gơ̆r hop akŏm đơ̆ng Đảng khul Kuô̆k hô̆i hăm Khul chĕp kơ̆l Đảng kơ Khul kơ dră tĕh đak găh tơ drong hơ met ăn Hop akŏm ‘măng mă 2, Kuô̆k hô̆i jăl XV (vă pơ gơ̆r đơ̆ng ‘năr 20/10). Pơ ma pơ tôch hop akŏm, Kơ dră Kuô̆k hô̆i Vương Đình Huệ ăn tơ băt, truh dang ei, đĭ đăng tơ drong hơ met ăn hop akŏm mă 2 hlôi jang đang ngăl bơih, hăm tơ drong drơ̆ng nơ̆r tôch kơ jung.

Rup hop akŏm

Kơ dră Kuô̆k hô̆i oei athei, kơ dră chĕp kơ̆l Kuô̆k hô̆i, Khul kơ dră tĕh đak, Anih tơm sek tơ lang kon pơ lei, Anih tơm dăr hơ len kon pơ lei, Anih chĕp kơ̆l pơ gơ̆r Trung ương MTTQ Việt Nam, 4 anih jang kơ Trung ương hơ nơ̆ng pơ tho ăn dôm anih jang kơ pal jang hơ doi mă kơ jăp mưh pơ gơ̆r hop akŏm mă 2 vă tơ tom sek tơ lang dôm tơ drong ưh hơ iă ‘nao đei. Kơ dră Kuô̆k hô̆i Vương Đình Huệ tơ tă, tơ drong hơ met ăn hop akŏm mă 2 ưh gơ̆h lăng pơ hơi, athei kơ chăng tôch ai tơ drong tang găn jĭ, vei sơ đơ̆ng tơ pôl păng tơ drong tơ roi tơ băt.

Dơ̆ng: Tơ blơ̆