VOV4.Bahnar - Kơ sơ̆ brei, Kơ dră Kuôk hô̆i Vương Đình Huệ hlôi bơ̆ jang hăm Anih jang Kuôk hô̆i păng rim anih jang ƀơm truh găh tơ drong hơ met ăn dôm tơ drong hiôk pơ gơ̆r ‘Măng hop akŏm mă 2, Kuôk hô̆i jăl 15 pơ tơm pơ gơ̆r lơ̆m ‘năr dơ ning ‘năr 20/10. Kiơ̆ kơ Tổng Thư ký Kuôk hô̆i, Kơ dră vei lăng Anih jang Kuôk hô̆i, dôm tơ drong tơm ‘Măng hop akŏm hlôi gơh pơ truh ăn Kuôk hô̆i. Tơ drong jang hơ met ăn găh kơ tơ̆ng ang tơ roi tơ băt, tơ mam drăm, ki thuơ̆t, vei sơ đơ̆ng, sơng pơ ma dơ nuh, jang tơ gŭm, tang găn jĭ hơ buh... hlôi jang đang đĭ vă pơ vih pơ văn ăn ‘măng hop akŏm. ‘Măng hop akŏm ‘măng âu hơ drin proh hơ met vă tơ jur jơ năr bơ̆ jang ( tơ chĕng hơ drol dang 17 năr) mă lei oei athei vei sơ đơ̆ng ‘lơ̆ng dôm nơ̆r tơl plơ̆ đơ̆ng Kuôk hô̆i hăm tơ drong hơ tŏk tơ iung kơ teh đak lơ̆m sơ năm 2022 păng dôm sơ năm đơ̆ng rŏng dơ̆ng, vei sơ đơ̆ng tang găn jĭ Covid-19. Lơ̆m kơ plăh pơ gơ̆r ‘măng hop akŏm, Kơ dră Kuôk hô̆i Vương Đình Huệ athei tơ gĕch yua tôch ai jơ năr pơ ma dơ nuh tơ̆ grŭp păng tơ̆ anih hop akŏm tơm; hơ nơ̆ng tơ plih ‘nao păng hơ tŏk ‘lơ̆ng tơ drong jang thư ký, akŏm tơ gop nơ̆r pơ ma dơ nuh păng tơ blang hơ dăh dôm tơ drong tơ lĕch ăn kiơ̆ pơ ma dơ nuh. Kŭm hăm ‘noh, Kơ dră Kuôk hô̆i pơ ma hơ dăh hơ tŏk ‘lơ̆ng hơ năp jang đơ̆ng rim Grŭp đảng, hơ tŏk loi dơ̆ng hơ năp jang, nơ̆r pơ ma đơ̆ng rim bơ ngai tang măt Kuôk hô̆i tơ pă tang măt ăn đon hơ drin, ‘mĕh vă đơ̆ng kon pơ lei, yua kơ tơ drong đei yua atŭm kơ teh đak, pơ ma  dơ nuh hơ len, tơl plơ̆ ƀlep yua kơ tơ drong hơ tŏk tơ iung atŭm.

Thuem: Tơ blơ̆