VOV4.Bahnar - Kiơ̆ tơ drong tơ chĕng đơ̆ng Anih tơm vei lăng pơ tho pơ hrăm, ‘măng thi tốt nghiệp THPT sơ năm 2021 pơ gơ̆r đơ̆ng ‘năr 7 truh ‘năr 9-7 âu kơnh. ‘Măng thi sơ năm ‘nâu pơ gơ̆r ƀât oei đei jĭ COVID-19 tôch hơ mơt kơ na đĭ đăng rim tơ drong vă pơ gơ̆r thi đei hơ met đang ‘lơ̆ng vă gơ̆h tang găn jĭ. Tơ̆ tơ ring Tây Nguyên, khei ‘năr âu ki, anih pơ tho pơ hrăm dôm tơ ring hơ tŏk hrĕnh tơ drong pơ tho hŏk ăn hŏk tro lăm 12, pơ gơ̆r thi ăn đe hŏk tro mă lăp, đei yoa ‘lơ̆ng.

Tơ̆ hơ năp tơ drong krê hơ mơt đơ̆ng jĭ Covid-19, anih pơ tho pơ hrăm Dak Lak oei adrin tơ lĕch lơ trong ôn ƀai, tơ gŭm ăn hŏk tro lăm 12 hơ met ‘lơ̆ng hlŏh ăn ‘măng thi tốt nghiệp THPT. Sơ năm ‘nâu, Dak Lak đei hlŏh 19.800 ‘nu hŏk tro chih măt vang thi. Lơ̆m nŏh đei hlŏh 4.700 ‘nu ŏh chih măt thi vă iŏk ƀăng tốt nghiệp, 14.400 ‘nu ŏh thi vă iŏk điêm mât hŏk Đăi hŏk, Cao đẳng. Tơ̆ hơ năp tơ drong jĭ Covid-19 oei tôch hơ mơt, ƀât mă dêh char Dak Lak ‘nao đei 1,2 ‘nu bơ ngai jĭ Covid 19, anih pơ tho pơ hrăm Dak Lak kơ chăng tơ lĕch lơ trong ôn ƀai păng pơ gơ̆r thi mă lăp hăm yăn âu lơ̆m khei ‘năr pơ gơ̆r thi.

Hăm hŏk tro lăm 12, Anih vei lăng pơ tho pơ hrăm hlôi pơ tho ăn dôm hnam trưng lăng kiơ̆ trong pơ tho pơ hrăm kơ chăng tơ lĕch trong jang, akŏm jơ hngâm ăn tơ drong ôn ƀai vă thi tốt nghiệp THPT. Lơ̆m nŏh, dôm hnam trưng klăih song tơ drong pơ gơ̆r vei lăng kiơ̆ môn mă ưh ‘nŏh kiơ̆ lăm; pơ lung, hơ păh tơ tom ăn rim bơ ngai, khul grŭp jang ‘lơ̆ng; tơ tă, hil dôm bơ ngai, khul grŭp jang ưh tơ năp lơ̆m tơ drong pơ gơ̆r ôn thi. Mă đơ̆ng ƀơm ưh ‘lơ̆ng đơ̆ng jĭ Covid-19, mă lei hŏk tro lăm 12 lơ̆m dêh char oei năm hŏk hơ nơ̆ng, hơ dai hăm hŏk trư̆k tuyê̆n păng anih pơ tho pơ hrăm Dak Lak hlôi hơ met lơ trong vă pơ tho hŏk, ôn ƀai lơ̆m khei ‘năr đei jĭ Covid-19, mưh kăl ‘nŏh tơ lĕch trong jang kiơ̆ hloi.

Dak Lak pơ gơ̆r ôn thi ăn hŏk tro

Ƀok Phạm Đăng Khoa, Kơ dră Anih vei lăng pơ tho pơ hrăm Dak Lak ăn tơ băt: “Nhôn oei hơ met tôch ai, athei dôm hnam trưng pơ gơ̆r ôn thi, atŭm hăm ‘nŏh vang roi tơ ƀôh ăn Dơ nŏ anih vei lăng kon pơ lei dêh char găh tơ drong pơ gơ̆r thi tơ̆ dêh char, tơ lĕch trong pơ gơ̆r thi, dăr hơ len dôm anih pơ gơ̆r thi vă ‘măng thi gơ̆h pơ gơ̆r sơ đơ̆ng ‘lơ̆ng, trŏ tơ drong hơ găt, đei kơ sô̆ hŏk tro thi tŏk lơ ƀiơ̆ kơ sơ năm hŏk 2019-2020”.

‘Nao âu, Dơ nŏ anih vei lăng kon pơ lei dêh char Lâm Đồng đei hla ar drơ̆ng nơ̆r asong ăn hŏk tro, sinh viên dôm hnam trưng tơ̆ tơ ring pơ gơ̆r thi hŏk ki 2 păng athei pơ gơ̆r đang adrol kơ ‘năr 21/5. Pơ tôch tơ drong thi âu, đe hŏk tro, sinh viên tơ̆ tơ ring pơ dơ̆h hŏk dơ̆ng vă tang găn jĭ Covid-19. Hăm hŏk tro lăm 12, Dơ nŏ anih vei lăng kon pơ lei dêh char Lâm Đồng athei Anih vei lăng pơ tho pơ hrăm dêh char pơ tho trong ôn thi tốt nghiệp THPT kiơ̆ trong trư̆k tuyê̆n. Hăm dôm tơ ring mơ mat tat, tơ ring kon kông, ưh đei tôm tơ mam kăl, ki thuơ̆t ‘lơ̆ng vă ôn thi trư̆k tuyê̆n ‘nŏh gơ̆h pơ gơ̆r ôn thi atŭm mă lei athei vei lăng rơ gŏh ‘lơ̆ng, pruih pơ gang pơ lôch pơ rang jĭ tơ̆ lăm hŏk, tơ mam pơ tho pơ hrăm adrol ăn hŏk tro truh hŏk. Lơ̆m jơ hŏk tro hŏk pơ hrăm, ưh gơ̆h ngôi hơ dai lơ hlŏh 30 ‘nu hŏk tro 1 lăm păng athei gom muh măt, chih tơ roi găh jơ hngâm jăn, ngôi hơ tăih băl, pơm ‘lơ̆ng dôm tơ drong hơ găt tang găn jĭ.

Tơ̆ hop akŏm Anih pơ gơ̆r kơ tĕh đak găh tơ drong thi Tốt nghiệp THPT sơ năm 2021 ‘nao âu, Phŏ Kơ dră tơm vei lăng pơ tho pơ hrăm Nguyễn Hữu Độ, Kơ dră Anih pơ gơ̆r thi athei dôm khul dăr lăng jang hơ doi hăm khul jang pơ gang. ‘Nâu jĭ nơ̆r athei tôch gĭt kăl, yoa ‘măng thi sơ năm ‘nâu pơ gơ̆r ƀât mă jĭ COVID-19 oei tơ pŏh tôch hơ mơt kơ na đĭ đăng tơ drong lơ̆m ‘măng thi athei hơ met ‘lơ̆ng vă tang găn jĭ. Kiơ̆ nơ̆r tơ roi đơ̆ng ƀok Nguyễn Đức Cường, Kơ dră Anih Dăr hơ len kơ Anih tơm vei lăng pơ tho pơ hrăm, ‘măng thi sơ năm ‘nâu oei đei vei kơ jăp ‘lơ̆ng păng đei trong tơ plih ming mă lăp hăm tơ drong pơ gơ̆r thi lơ̆m khei ‘năr đei jĭ. Kiơ̆ kơ ‘nŏh, chih iŏk tơ drong kăl đơ̆ng ‘măng thi sơ năm 2020, tơ drong dăr hơ len rim tơ drong hơ met vă pơ gơ̆r thi sơ năm 2021 đei pơ gơ̆r đơ̆ng trung ương truh tơ̆ jơ̆p tơ ring. Hăm dôm tơ ring đei kơ sô̆ hŏk tro thi lơ, dôm ‘măng thi adrol ki đei lơ tơ drong ưh hơ iă ‘nŏh sơ năm ‘nâu gô đei dăr hơ len kơ jăp ƀiơ̆ iŏk đơ̆ng tơ drong hơ met ăn ‘măng thi hloi.

Ƀok Nguyễn Đức Cường, Kơ dră Anih Dăr hơ len kơ Anih tơm vei lăng pơ tho pơ hrăm ăn tơ băt: “Găh tơ drong châm thi ‘nâu jĭ tơ drong kăl tơ plih mă lăp hlŏh, kiơ̆ tơ drong hơ găt đơ̆ng Luơ̆t Dăr hơ len ‘nŏh sơ năm ‘nâu vă tơ plih tơ drong pơ gơ̆r hơ len năng châm thi truh đĭ khei ‘năr châm thi kiơ̆ đơ̆ng pơ gơ̆r hơ len năng tơ drong châm thi tơ̆ dôm anih châm. 63 khul dăr hơ len đơ̆ng Anih tơm tơ̆ 63 anih châm thi bơ̆ jang hơ nơ̆ng lơ̆m jơ năr châm thi vă gơ̆h tơ păt ‘lơ̆ng hlŏh. Dôm khul âu nhôn krao hloi dôm khul jang đơ̆ng Anih tơm păng đe ƀok thây pơ tho đăi hŏk hai”.

Kiơ̆ kơ sô̆ chih jô̆ đơ̆ng Anih tơm vei lăng pơ tho pơ hrăm, truh dang ei đei hlŏh 1 triu ‘nu hŏk tro chih măt thi tốt nghiệp THPT sơ năm 2021, lơ̆m nŏh đei hlŏh 41 rơ bâu hŏk tro chih măt năm thi kơ dih. Lơ̆m kơ sô̆ hlŏh 1 triu ‘nu hŏk tro chih măt thi tốt nghiệp THPT sơ năm ‘nâu, đei hlŏh 222 rơ bâu ‘nu hŏk tro thi vă iŏk ƀăng tốt nghiệp, hlŏh 33 rơ bâu hŏk tro vă iŏk điêm hŏk tơ̆ kơ pal. Kơ sô̆ hŏk tro thi vă iŏk ƀăng tốt nghiệp hai, vă iŏk điêm mât hŏk tơ̆ dôm hnam trưng đăi hŏk hai ‘nŏh hlŏh 758 rơ bâu ‘nu, iŏk đei 74%. Kơ sô̆ hŏk tro rơih ƀai thi khoa học xã hội oei lơ ƀiơ̆, hăm hlŏh 541 rơ bâu ‘nu ŏh.

Quốc Học: Chih

Dơ̆ng: Tơ blơ̆