VOV4.Bahnar - Jang kiơ̆ tơ drong tơ chơ̆t kơ sô̆ 19 đơ̆ng Trung ương pơ jao Đảng khŭl Kuôk hô̆i athei tơ drong hơ met ming, tơ mơ̆t dơ̆ng Luơ̆t găh teh sơ năm 2003; hơ dai hăm ‘noh dăr hơ len, chih pơ keh rim luơ̆t đei ƀơm truh, pơm tơ drong trŏ luơ̆t ăn tơ drong jang kiơ̆ tơ drong tơ chơ̆t păng dăr hơ len tơ drong jang kiơ̆ lơ̆m teh đak, kơ sơ̆ ‘năr (19/8), Kơ dră Kuôk hô̆i Vương Đình Huệ kŭm hăm khŭl bơ̆ jang hlôi đei jơ bơ̆ jang hăm Anih tơm vei lăng găh tơ mam drăm păng cham char. Pơ tôch tơ̆ jơ bơ̆ jang, Kơ dră Kuôk hô̆i Vương Đình Huệ akhan, Luơ̆t găh teh ‘noh jĭ 1 luơ̆t đei tơ drong tơm lơ̆m tơ drong jang khôi luơ̆t găh teh, 1 lơ̆m dôm tơ drong jang hla ar khôi luơ̆t đei gĭt kăl hloh, ƀơm truh tơ drong tôch kơ tih, đei krê hơ mơt păng mơ mat tôch kơ dêh.

Kơ dră Kuôk hô̆i pơ ma hơ dăh, kăl hơ nơ̆ng tơ chĕng hơ len tơ drong đei ƀơm đơ̆ng tơ drong jang pơ jing luơ̆t, lăng kăl tơ drong hơ len lăng đei ƀơm 1 trong tơ păt, rơ đăh, ‘lơ̆ng, dôm tơ drong ‘nao mă tam mă đei kơ plăh tơ chĕng hơ len ‘noh mă pơ ‘lơ̆ng. Hơ dai hăm ‘noh, tơ drong chih iŏk, tơ blang hơ dăh kŭm athei ling lang lăng, răp mơ̆ng lơ pang, hơ dai hăm ‘noh pơ jing tơ drong ‘lơ̆ng hiôk hian.

Thuem: Tơ blơ̆