VOV4.Bahnar - Pơ gê 7/9, tơ̆ Hà Nội, Anih tơm vei lăng choh jang xa păng atŏk tơ iung tơ ring tơ rang hôp trư̆k tuyê̆n hăm dôm tơ ring păng Khul jang pơ ma găh trong hơ met pơ ‘lơ̆ng mơ mat tat vă gơ̆h iŏk đei tơ drong hơ găt tĕch tơ mam đơ̆ng tơ̆r ‘long tơ̆ tĕh đak đe sơ năm ‘nâu.

Jĭ Covid 19 tơ pŏh ‘măng mă 4 pơm kơ nê̆ tôch dêh truh tơ drong pơm tơ lĕch, tĕch mơ dro tơ mam đơ̆ng anih jang ‘long, mă loi ‘nŏh jĭ tơ̆ tơ ring Pơ băh, tơ ring akŏm đei hlŏh 70% kơ sô̆ anih jang, hăm kơ jă tĕch tơ̆ tĕh đak đe vă truh 80% akŏm đĭ đăng jên tĕch tơ mam đơ̆ng tơ̆r, ‘long tơ̆ tĕh đak đe đơ̆ng tĕh đak bơ̆n. Pơ hlom năng đei hlŏh 1 puăt kơ sô̆ anih jang athei tang ‘măng pơ dơ̆h jang mă ưh ‘nŏh tơ jur ƀiơ̆ kơ sư̆k jang yoa đơ̆ng jĭ.

Vă hơ met pơ ‘lơ̆ng mơ mat tat ăn anih jang, găh Anih tơm vei lăng choh jang xa păng atŏk tơ iung tơ ring tơ rang athei Khul kơ dră tĕh đak păng Anih pơ gơ̆r jang kơ tĕh đak găh tang găn jĭ Covid 19 pơ ‘nhŏ vắc xin tang găn jĭ Covid 19 ăn dôm tơ ring đei anih tĕch mơ dro oei jang xa. Atŭm hăm ‘nŏh tơ gŭm păng pơ tho ăn dôm anih jang kơ chăng răt păng pơ gơ̆r set hơ len hrĕnh păng set hơ len kiơ̆ trong PCR tơ gŭm jên; asong ăn dôm anih jang kơ chăng chă vắc xin vă ƀet ăn bơ ngai jang.

Dơ̆ng: Tơ blơ̆