VOV4.Bahnar - ‘Năr 22/10, Kơ dră chĕp kơ̆l anih jang tang măt Việt Nam tơ̆i Khon Kaen jang hơ dai hăm khŭl kơ dră păng Khŭl bơ ngai Thái hơ drĕch Yuăn dêh char Nakhon Phanom pơ gơ̆r pơm Lêh tơ băt 45 sơ năm pơ jing tơ drong pơ vei jang tơ bôl Việt Nam-Thái Lan tơ̆ Plei tơ bôl Thái-Yuăn tơ̆ plei Mạy, hơ nih ƀok Kơ dră Hồ Chí Minh pơ dơh jơ̆ng lơ̆m khei 7/1928. Pơ ma tơ̆ lêh tơ băt, Kơ dră chĕp kơ̆l anih tang măt Việt Nam tơ̆ Khon Kaen Chu Đức Dũng pơ ma hơ dăh: 45 sơ năm âu ki, Việt Nam păng Thái Lan hlôi hơ drin vang hơ dai băl hơ nhăk tơ drong pơ vei đơ̆ng 2 teh đak hơ tŏk tơ iung pran kơ tang, pơm hơ tŏk tơ drong pơ vei jang hơ dai tơ bôl, lui ngeh, pơ yom băl, hơ tŏ hơ nơ̆ng, vang đei yua. Thái Lan dang ei hlôi jing teh đak jang hơ dai gĭt kăl kơ Việt Nam lơ̆m ASEAN. Kiơ̆ Kơ dră chĕp kơ̆l anih tang măt Chu Đức Dũng, tơ̆ ‘măng pơ ma điên thoăi đơ̆ng 2 Thủ tướng teh đak Việt Nam păng Thái Lan khei 5 âu ki, 2 kơ dră chĕp kơ̆l drơ̆ng nơ̆r lơ̆m khei ‘năr jĭ COVID-19  dang ei, 2 teh đak kăl hơ tŏk loi dơ̆ng jang hơ dai kơ jăp, tơ pă, đei yua, ‘lơ̆ng, hơ nhăk ăn tơ drong arih sa phĭ tơ nŏ, hiôk hian ăn kon pơ lei 2 teh đak, hơ drin hơ nhăk jên mơ dro sa 2 pang đei  25 ti đô lar lơ̆m sơ năm 2025.

Ƀlep ƀơ̆t ‘măng âu, 1 tơ drong pơ dă tơ ƀôh găh tơ drong arih sa bơ̆ jang đơ̆ng ƀok Kơ dră Hồ Chí Minh păng 45 sơ năm pơ vei jang tơ bôl Việt Nam - Thái Lan kŭm hăm 1 jơ nŭm kơ chơ tĕch tơ bôh tơ mam Việt Nam – Thái Lan kŭm hlôi đei pơ gơ̆r, sơng đei tơ drong bơ ngơ̆t truh đơ̆ng rim bơ ngai tang măt păng kon pơ lei đơ̆ng teh đak bơ̆n oei tơ̆ teh đak đe vang akŏm.

Thuem: Tơ blơ̆