VOV4.Bahnar - ‘Năr 24/6, tơ̆ Anih jang Khŭl kơ dră teh đak, Phŏ Thủ tướng chĕp kơ̆l pơ gơ̆r teh đak Trương Hòa Bình, Kơ dră anih pơ gơ̆r Trung ương Tơ drong jang tơm teh đak hơ tŏk tơ iung mŭk drăm – tơ pôl tơ ring kon pơ lei kon kông păng tơ ring groi kông jăl jang 2021-2030, pơ gơ̆r ‘măng hop akŏm kơ Anih pơ gơ̆r jang. Pơ tôch jơ bơ̆ jang, Phŏ Thủ tướng Trương Hòa Bình pơ ma hơ dăh hơ nơ̆ng hơ tŏk ‘lơ̆ng đon hơ drin kơ dih, iung jang kơ dih, yak tŏk kơ dih đơ̆ng kon pơ lei kơ rim hơ drĕch kon kông, pơm đei dôm tơ drong jang pơ jei băl hơ iă. Rim anih jang mơ̆t jang kơ tang vă tơ drong jang âu tơ pă iŏk yua, tơ drong arih sa kon pơ lei kon kông păng tơ ring groi kông roi ‘năr roi đei hơ tŏk ‘lơ̆ng.

Kiơ̆ kơ Phŏ Thủ tướng Trương Hòa Bình, lơ̆m khei ‘năr jĭ COVID- 19 hơ nơ̆ng ƀơm ư̆h kơ ‘lơ̆ng truh rim tơ drong jang đơ̆ng tơ drong arih sa mŭk drăm – tơ pôl, Tơ drong jang âu tơ gop 1 hơ năp jang tôch kơ tih, tơ gop pơ trŭt tĕch răt, pơm tơ drong jang, hơ tŏk tơ iung pơm tơ lĕch, tĕch mơ dro hai, hơ nhăk tơ drong ‘lơ̆ng gĭt kăl găh vei sơ đơ̆ng tơ pôl hai, mă loi ‘noh jĭ hăm dôm bơ ngai ư̆h kơ pran, rim ŭnh hnam dơ nuh hin, ŭnh hnam mơ mat tat tơ̆ rim tơ ring hơ tăih hơ tŏ.

Thuem: Tơ blơ̆