VOV4.Bahnar - Khul jang đơ̆ng Anĭh tơm vei lăng khul linh tĕh đak yoa Trung tướng Phùng Sĩ Tấn, Phŏ Kơ dră jang tơ gŭm ăn Khul linh kon pơ lei Việt Nam chĕp kơ̆l truh hơ pong, bơ̆ jang hăm Dơ nŏ anĭh vei lăng kon pơ lei dêh char găh tơ drong chưk pơ ‘ngoăih tĕh ăn tơ drong jang pơm Trong Trường Sơn Đông tơ̆ dêh char Dak Lak.

Tơ drong jang pơm trong Trường Sơn Đông kơ dâu klĕch dêh char Dak Lak kơ jung hlŏh 126 km. Truh dang ei, hlôi pơm đang, hơ len năng tơ mât yoa 52 km. Sơ năm 2020, tơ lĕch jang 13 jăl trong. Mă lei, yoa ƀơm ưh ‘lơ̆ng đơ̆ng tơ drong jang chưk pơ ‘ngoăih tĕh kơ na 1,2 jăl trong tơ̆ dêh char pơm hiơ̆ hyĭn. 

Lơ̆m jơ bơ̆ jang, Trung tướng Phùng Sĩ Tấn athei kơ dră chĕp kơ̆l dêh char Dak Lak tơ rĕk, pơ tho ăn dôm anĭh jang kơ pal jang hơ doi kơ jăp hăm Anĭh vei lăng tơ drong jang vă hơ tŏk hrĕnh tơ drong jang ming man, pơm hla ar, chưk pơ ‘ngoăih tĕh. Kơ dră chĕp kơ̆l dêh char pơ ma hơ dăh vă pơ jing tơ drong ‘lơ̆ng vă tơ drong jang gơ̆h bơ̆ jang trŏ tơ drong hơ găt; năng ‘nâu jĭ tơ drong ‘lơ̆ng vă tơ ring gơ̆h jang atŏk tơ iung mŭk drăm, tơ pôl hơ dai hăm hơ met kơ jăp tơ drong vei lăng sơ đơ̆ng tĕh đak.

Dơ̆ng: Tơ blơ̆