VOV4.Bahnar - Âu ki hlôi pơ gơ̆r Hop akŏm trực tuyến đơ̆ng Khŭl kơ dră chĕp kơ̆l pơ gơ̆r teh đak hăm 27 dêh char, pơ lei tơm tơ ring pơ băh đơ̆ng Phú Yên truh Cà Mau găh tơ drong jang tang găn jĭ hơ buh Covid-19. Pơ ma tơ̆ hop akŏm, Thủ tướng Phạm Minh Chính athei kăl hơ tŏk jơ hngơ̆m pran tơ goăt 1 jơ hngơ̆m đon đĭ đăng hơ drĕch hơ drŭng, pơ đĭ hloi khŭl jang chĭnh trĭ, tơ pôl, kon pơ lei, anih jang mơ dro sa, tơ pôl hơ năp jang, vang tơ gŭm băl bơ̆ jang kiơ̆ tang găn jĭ.

Tơ̆ hop akŏm, rim bơ ngai tang măt hlôi akŏm pơ ma dơ nuh hơ len lăng tơ drong jĭ hơ buh COVID-19 hrei ‘nâu păng tơ dra hơ drol tơ drong tơ̆ hơ năp kơnh; pơ tôch, tam mă gan ‘lơ̆ng lơ̆m kơ plăh bơ̆ jang kiơ̆ rim hơ năp jang, mă loi ‘noh jĭ găh tơ drong jang athei, pơ gơ̆r jang kiơ̆, tơ drong jang hơ dai đơ̆ng rim anih jang, tơ ring vă tơ drong jang tang găn jĭ đei yua hloh, kiơ̆ lơ̆m tơ drong vei lăng jơ hngơ̆m pran kon pơ lei ‘noh kăl hloh, mă hơ drol, tơ gŭm hơ drol tơ̆ rim tơ ring kơ plăh âu ‘noh jĭ tang găn jĭ  COVID-19, dôm anih sơ đơ̆ng, ‘noh oei pơ vei pơm tơ lĕch, hơ tŏk tơ iung mŭk drăm. Tơ roi tơ băt tơ̆ Hop akŏm, Kơ dră Anih tơm vei lăng găh jang pơ gang Nguyễn Thanh Long tơ băt, tơ drong jĭ hơ buh lơ̆m teh đak oei hơ nơ̆ng ƀôh krê hơ mơt:

“Găh lơ dang ei ‘noh pơ rang vir delta lơ̆m teh đak, pơ rang vir âu pơm ăn tơ drong hiong răm hăm jơ̆p plei teh. Yua kơ liơ bơ̆n ƀôh akhan ‘măng âu sư pơ poh jĭ kiơ̆ lơ hơ nih, kiơ̆ bơ ngai, đei lơ bơ ngai jĭ lơ̆m 1 jơ năr thoi noh. Yua kơ tơ lĕch pơ rang jĭ đơ̆ng bơ ngai đei jĭ hrĕnh hloh păng khei ‘năr krao ‘noh tơ poh đơ̆ng sư hrĕnh hloh hơ drol. Nhôn kŭm khan lê̆ hơ drol hăm rim tơ ring tơ jră hăm jĭ ư̆h kơ sĭ nhen dôm ‘măng hơ drol, athei tơ jră tơ drong mă hrĕnh hloh, kơ tang hloh, pơ ‘lơ̆ng hloh păng kơ hret hloh.”

Tơ̆ hơ năp tơ drong jĭ đei ƀôh krê hơ mơt, pơ lei tơm Hồ Chí Minh hlôi kơ chăng tơ jră. Kiơ̆ Kơ dră chĕp kơ̆l pơ lei tơm Nguyễn Thành Phong, pơ lei tơm hơ met tôm ăn tơ drong tơ jră mư̆h đei 20 rơ bâu ‘nu jĭ.

“Hăm tơ drong kơ hret đơ̆ng tơ drong roi tŏk găh kơ sô̆ bơ ngai jĭ tơ̆ hơ năp khei ‘năr jang kiơ̆ tơ drong tơ chơ̆t 16, pơ lei tơm hlôi akŏm hơ met ming păng ăn tơ mơ̆t yua lơ̆m 5 grŭp hnam chŭng kư tŏk bŏk ư̆h kơ đei bơ ngai oei kơ anih oei hle tơ̆ phường An Khánh, pơ lei tơm Thủ Đức să ‘noh 24.000 tŏ giơng păng hơ nih hơ met jĭ ăl hăm kơ măy kơ mŏk hơ gei păng kĕ tơ gŭm dui jơ hngơ̆m 1 ‘măng truh  1.000 ‘nu jĭ, truh dang ei ‘noh pơ lei tơm gơ̆h sơ kơ̆t hơ dăh ‘noh jĭ hlôi hơ met tôm ăn tơ drong tơ jră mư̆h đei 20.000 ‘nu jĭ”.

Hop akŏm trực tuyến đơ̆ng Khŭl kơ dră chĕp kơ̆l pơ gơ̆r teh đak hăm 27 dêh char, pơ lei tơm găh pơ băh

Đơ̆ng rŏng kơ mơ̆ng dôm nơ̆r tơ gop pơ ma dơ nuh đơ̆ng rim tơ ring păng anih tơm, anih jang, pơ tôch ‘măng hop akŏm, Thủ tướng teh đak Phạm Minh Chính pơ ư kơ dôm jơ nei mă pơ lei tơm Hồ Chí Minh păng rim dêh char hlôi iŏk đei lơ̆m khei ‘năr âu ki, hlôi hơ drin đĭ jơ hngơ̆m, yua kơ jơ hngơ̆m pran, hơ kâu jăn kơ kon pơ lei. Thủ tướng athei kăl kơ đei trong jang pran kơ tang, tơ păt, hơ dai tơ drong, ‘lơ̆ng, đei yua hloh vă tang găn jĭ hơ buh, lăng tơ drong vei lăng jơ hngơ̆m pran jăng kơ kon pơ lei ‘noh kăl hloh, ư̆h kơ lê̆ kon pơ lei hơ yơ ư̆h kơ măh por sŏng, hơ băn ao hrŭk, tơ mam sa lơ̆m kơ plăh âu; akŏm dŏng hơ met bơ ngai đei jĭ, tang găn tŏ sĕt hloh kơ sô̆ bơ ngai lôch; vei kơ jăp sơ đơ̆ng chĭnh trĭ, sơ đơ̆ng tơ pôl ăn kon pơ lei tôch ai, vei kơ jăp tơ ring sơ lam, ư̆h kơ lê̆ đe mơ̆t glăi đơ̆ng teh đak đe; vei lăng kơ jăp dôm hơ nih pơm tơ lĕch - hơ nih vei sơ đơ̆ng tĕch mơ dro. Găh đon tơ chĕng chĕp kơ̆l, Thủ tướng pơ ma hơ dăh kăl hơ tŏk jơ hngơ̆m tơ goăt tơ goăl đĭ đăng hơ drĕch hơ drŭng lơ̆m tang găn jĭ:

“Vei kơ jăp jơ hngơ̆m đon “ tơ jră jĭ nhen tơ jră ayăt”, hơ drin iŏk yua hloh dơ̆ng tơ plih đơ̆ng tang găn hiă jing tơ drŭt. Iŏk tang găn jĭ ‘noh tơ drong jang đunh đai, kơ tang. Hơ tŏk jơ hngơ̆m pran tơ goăt 1 jơ hngơ̆m đon đĭ đăng hơ drĕch hơ drŭng, pơ đĭ hloi khŭl jang chĭnh trĭ, tơ pôl kon pơ lei, anih jang mơ dro sa, tơ pôl jang tơ năp, vang hơ dai băl bơ̆ jang tang găn jĭ, jang kiơ̆ rim hơ drong hơ găt, trong jang hlôi đei rim kơ dră gơ̆h kĭ tơ chơ̆t tơ lĕch ăn, pơ tho. Hơ tŏk ‘lơ̆ng tôch ai jơ hngơ̆m đon hơ drin kơ dih, hơ gei, kơ chăng đơ̆ng rim kơ dră, rim anih jang, tơ ring. Tơ drong ‘nao athei đei trong gơ̆h jang ‘nao, kăl kơ jang kiơ̆ tơ drong, lăng kiơ̆ mă hơ dăh vă tơ lĕch trong jang mă lăp, hơ tŏk tôch ai jang hơ gei, kơ chăng. 1 xăh, phường, hnam kơ măy, anih jang athei  jing hơ nih kơ jăp tang găn jĭ, rim ‘nu kon pơ lei jing 1 khŭl linh iung jang lơ̆m tơ drong jang tang găn jĭ”.

Hơ dai hăm ‘noh, kăl kơ pơ yom tơ drong đei yua trŏ ƀlep khôi luơ̆t đơ̆ng kon pơ lei, hơ tŏk ‘lơ̆ng đei yua pơ vih pơ văn ăn kon pơ lei. Vang tơ jră jĭ ‘noh jĭ hơ năp jang, tơ drong jang păng tơ drong đei yua đơ̆ng kon pơ lei. Kơ dră đảng, khŭl jang đảng, khŭl kơ dră, khŭl jang chĭnh trĭ rim tơ ring athei tơ ƀôh hơ dăh ‘noh jĭ hơ nih lui ngeh đơ̆ng kon pơ lei; tơ plih mơ mat tat, long nol jing tơ drong ‘lơ̆ng jang đei, pơ vih pơ văn ăn kon pơ lei ‘lơ̆ng hloh. Krao hơ vơn kon pơ lei vang tơ gŭm, roi tơ ƀôh đon hơ drin ăn kon pơ lei jang kiơ̆ tơ păt dôm tơ drong hơ găt đơ̆ng teh đak găh tang găn jĭ păng pơm tơ lĕch, tĕch mơ dro. Iŏk jang pơ tăl, hơ tŏk rim trong jang, jơ nei, ƀai hŏk ‘lơ̆ng, bơ ngai jang ‘lơ̆ng hơ gei lơ̆m tơ jră jĭ.

Thủ tướng Phạm Minh Chính

        Rim tơ ring đei lơ bơ ngai tơ poh akŏm gơ var tơ ring, jăh sơ đơ̆ng tơ drong. Tơ gĕch iŏk rim tơ drong hiôk vă pơ trŭt pơm tơ lĕch tĕch mơ dro; pơ jing rim anih dŏng tơ gŭm, điên thoăi kăl, tơ mam mă lăp; tơ chĕng hơ len pơ jing trang mạng tơ mơ̆t yua kơ măy kơ mŏk kơ tơ̆ng ang vă kon pơ lei tơ roi tơ băt rim tơ drong mơ mat tat, tơ hlăk tơ hlĭn lai yơ kŭm gơh, vă kon pơ lei sơ đơ̆ng vang tơ gop, tơ gŭm lơ̆m tơ drong jang tang găn jĭ. Lơ̆m khei ‘năr tơ mơ̆t yua dôm tơ drong tơ chơ̆t 15, 16 ‘noh athei jang ‘lơ̆ng tơ drong jang tơ chĕng ‘lơ̆ng ăn kon pơ lei, vei lăng tơ drong arih sa jơ hngơ̆m đon ăn kon pơ lei, tơ jur tơ drong blĕk kơ đon đơ̆ng kon pơ lei. Rim anih jang chih kơ tơ̆ng ang tơ tom, tơ tĕnh tơ roi kơ tơ̆ng ang vă kon pơ lei hơ drin vang jang tơ drong jang tang găn jĭ.

          Thủ tướng athei rim kơ dră, rim anih jang, tơ ring hơ drin kơ tang hloh dơ̆ng, khŏm jang ‘lơ̆ng, jang tơ drong hơ yơ keh đang tơ drong ‘noh, jăh tơ tĕnh  pơ tôch jĭ hơ buh, hơ nhăk ăn tơ drong arih sa sơ đơ̆ng ăn kon pơ lei, jang kiơ̆ jơ nei tơ drong jang hơ dai.

            VOV 1

            Thuem: Tơ blơ̆