VOV4.Bahnar - “ Ŭnh điên kial hlôi hơ met tôm vă jing 1 tơ drong gĭt kăl lơ̆m tơ drong jang tơ plih ŭnh hơ yuh kơ teh đak păng tơ drong tơ tĕnh hơ tŏk tơ iung ŭnh điên âu ‘noh tôch kơ kăl ăn tơ jur tơ drong tơ lĕch hơ yuh hơ tŏ kơ Việt Nam”- ‘Noh jĭ hơ len lăng đơ̆ng rim bơ ngai tang măt vang Hop akŏm “ Hơ tŏk tơ iung ŭnh điên kial yua kơ tơ̆ hơ năp kơnh ŭnh hơ yuh rơ goh kơ Việt Nam” yua đơ̆ng Anih vei lăng mŭk drăm Trung ương păng Jơ nŭm vei lăng Ŭnh hơ yuh kial jơ̆p plei teh pơ gơ̆r lơ̆m kơ sơ̆ ‘năr 16/12, tơ̆ Hà Nội. Hop akŏm đei tơ drong ‘lơ̆ng gĭt kăl lơ̆m khei ‘năr Việt Nam tŏk bŏk tơ lĕch jang ‘lơ̆ng bơ̆ jang kiơ̆ rim trong jang hơ tŏk tơ iung ŭnh hơ yuh pơ ma atŭm păng ŭnh điên kial pơ ma hơ drô̆. Lơ̆m ‘năr 20 sơ năm kơ âu, tŏk jô̆ păh lăp đơ̆ng tơ mam ŭnh điên kơ Việt Nam đei kơ sô̆ 10-12% lơ̆m 1 sơ năm, hloh 1,5-2 ‘măng jang tŏk GDP đơ̆ng mŭk drăm.

Thuem: Tơ blơ̆