VOV4.Bahnar - Pơ gê hei (8/10) tơ̆ Hà Nội, Anih tơm vei lăng găh choh jang sa păng hơ tŏk tơ iung tơ ring tơ rang pơ gơ̆r hop akŏm trực tuyến lơ̆m teh đak găh “ Hơ tŏk tơ iung vei rong kon tơ rong dôm khei hơ tuch sơ năm 2021 păng tơ lĕch trong jang sơ năm 2022”. Tơ jră hăm lơ mơ mat tat, long nol nhen: jĭ Covid 19 tơ̆ bơ ngai păng jĭ tơ̆ kon tơ rong đei ƀôh krê hơ mơt; anih tĕch tơ mam mơ mat tat ƀơ̆t mă kơ jă tơ mam hiĕm kon tơ rong tŏk lơ mă lei kơ jă pơm tơ lĕch đơ̆ng tơ drong jang vei rong kon tơ rong jô̆ pơ hlom oei tŏk 4,2% pơ têng hăm khei ‘nâu sơ năm sơ̆. Kiơ̆ kơ ‘noh, 9 khei âu ki, akŏp tơ mam ‘nhĕm tĕch đơ̆ng hơ drong jô̆ pơ hlom hloh 4,7 triệu tấn; hloh 12 ti tŏ kơ tăp iĕr păng vă jê̆ 900 rơ bâu tấn đak toh...Kiơ̆ hơ len lăng atŭm, tơ drong jang vei rong kon tơ rong dôm khei hơ tuch sơ năm hơ nơ̆ng tơ jră hăm lơ mơ mat tat kăl athei hơ met pơ ‘lơ̆ng, mă loi ‘noh jĭ tơ drong chơ chuĕn tơ mam păng tơ mam pơ yua ăn vei lăng kon tơ rong vă pơ vei grŭp kon tơ rong păng rong dơ̆ng, hơ dai hăm vei sơ đơ̆ng pơ truh ăn ‘mĕh vă răt yua dôm khei hơ tuch sơ năm, năr Tết Nguyên đán păng 1 păh pơ yua ăn tĕch tơ̆ teh đak đe.

Thuem: Tơ blơ̆