VOV4.Bahnar - Đơ̆ng tơdrong jang chă mong hlak hla bơar so, rong nhŭng tĕh, răt lĭch têt vă pơjing Hơnĭh mong jên ăn Tơdrong jang iĕ, lơ hŏk tro ŭnh hnam tơnap tap tơ̆ Dak Lăk hlôi đei năm hŏk pơhrăm sơđơ̆ng jơhngơ̆m hlŏh dơ̆ng. Kon jên mong đơ̆ng tơdrong jang iĕ au hlôi đei rim dêh char pôk ăn kon jên hŏk pơhrăm, tơgŭm tơmam drăm hŏk pơhrăm, hơbĕn ao ăn hŏk tro dơnŭh:

Hŏk tro hnam trương Jăl ƀar Ngô Quyền Ea Drăng jang Tơdrong jang iĕ

Lăp đơ̆ng kô chĕp pơgơ̆r đô̆i tơlĕch lơ̆m jơ chao kơ pơgê năr mônh păng kô vei lăng lăm hŏk atŭm hăm khŭl vei lăng lăm tơroi tơbăt tơ̆ lăm hŏk, ŏh Nguyễn Quỳnh Nhi, lăm 7A2, hnam trương jăl 2 Ngô Quyền, thĭ trâ̆n Ea Drăng, apŭng Ea Hleo, dêh char Dak lăk hlôi hơdrin mong răk hla bơar đĭ so chĭh đang vă ‘măn ba ăn lăm hŏk. Nguyễn Quỳnh Nhi tơroi, ŏh hăm rim boăl vang jang tơnăp Tơdrong jang iĕ kơ yuơ hnam trương tơlĕch ăn. Ư̆h kơ đei kon jên lơ vă vang tơra tơgop kơna ŏh hơnơ̆ng chă mong hla bơar ƀăo so, kơthŭng carton lơ̆m ŭnh hnam đĭ hŭt dăh mă chă dônh dôm hlak hla bơar đe hŭt tơ̆ cham hnam trương dăh mă lơ̆m lăm hŏk chĕp ba brŏk tơ̆ hnam vă mong răk đơ̆ng nŏh ba ăn Tơdrong jang iĕ.“Rim năr đei hlak hla bơar ayơ pă yoa ‘nŏh ŏh iŏk tăh mong lơ̆m kơthŭng tơ jê̆ ŏh oei vă trŭh năr vang tơra hlak hla bơar đĭ hŭt ‘nŏh ŏh chĕp ba hla bơar au tăh lơ̆m kơdŭng nilon păng ba ăn hnam trương. Ĭnh chơt dêh kơ yuơ đei tơgŭm tŏ sĕt ăn kơ boăl dơnŭh lơ̆m hnam trương, tơgŭm kon jên chă tơgŭm djru ăn kơ boăl. ‘Ngoăih kơ ‘nŏh hnam trương nhôn jei iŏk kon jên au vă pơm cham pơchơt pơ hiơ̆”.

Hăm trong tơlĕch jang ƀônh, lơ̆m ‘măng tơlĕch jang blŭng a sơnăm hŏk 2020-2021, Hnam trương jăl ƀar Ngô Quyền hlôi dônh akŏm đei dang 2 tân hlak hla bơar so, kơ jă kơ jên 3 trĭu 500.000 hlak jên. Atŭm hăm nŏh, tơ̆ hnam trương oei tơlĕch jang rim ‘măng pơgơ̆r nhen: chă hơvơn tơgŭm ăn hơbĕn ao, kơsơ̆p hla bơar hŏk, tơmam drăm hŏk pơhrăm oei ‘lơ̆ng vă pôk ăn hŏk tro tơring tơnap tap. Lơ̆m 5 sơnăm hŏk au ki, hnam trương hlôi vang tơgop đei 1.500 blăh hơbĕn ao; 800 grŭp kơ sơ̆p hla bơar hŏk; hlŏh 200 tŏ môk, klang tap, tơmam drăm hŏk pơhrăm, hơtŏ 1 tân 2 tă tơmam drăm pôk ăn hơ iŏh tơnap tap tơ̆ tơring tơnap tap hlŏh lơ̆m apŭng. Ŏh Phan Trường Nhất, Kơ iĕng bơngai chĕp pơgơ̆r đô̆i kơ hnam trương jăl ƀar Ngô Quyền, thĭ trâ̆n Ea Drăng, apŭng Ea H’leo, dêh char Dak Lăk tơbăt:“Ĭnh ƀô̆h đe boăl vang jang kiơ̆ tôch tơnap, dôm hlak hla bơar tơpăr tơ̆ tĕh, dôm kơsơ̆p hla bơar chĭh đĭ chĭh đang ‘nŏh mong răk vă vang chă tơra tơgop tơgŭm ăn dôm boăl tơnap tap hlŏh, dôm boăl ŭnh hnam tơnap tap hŏk pơhrăm hơdrin”.

Đơ̆ng kon jên mong Tơdrong jang iĕ hlôi tơgŭm lơ bơngai jang lơ̆m đô̆i, hŏk tro đei sa yuơ

Ư̆h khan lăp hơdrô̆ tơ̆ hnam trương jăl ƀar Ngô Quyền, đơ̆ng lơ sơnăm kơ au, Tơdrong jang iĕ hlôi đei rim hnam trương jăl kơđĕh păng jăl ƀar tơ̆ Dak Lăk tơlĕch jang kơtang. Hăm lơ trong jang phara dĭh băl nhen: Boăl tơgŭm boăl, Boăl joăt vang hơdrin, Bô̆i phe ‘mêm mơnat, Iĕr khăn koang ƀrê, Hơnĭh mong jên kơ yuơ boăl dơnŭh, Rong nhŭng tĕh, ... tơdrong jang au hlôi lang să vă pơjing hơnĭh mong jên tơgŭm djru dôm hŏk tro ŭnh hnam tơnap tap, hơdrin hŏk pơhrăm. Ŏh Nguyễn Thái Thùy Linh, hŏk tro hnam trương jăl ƀar Tân Lợi, pơlei tơm Buôn Ma Thuột, dêh char Dak lăk tơroi:“Tơ̆ hnam trương Tân Lợi kơ nhôn đei lơ tơdrong jang tơgŭm boăl nhen dônh mong hla hla bơar hŭt, vang tơra hơbĕn ao, răt lĭch, ba nhŭng tĕh. Trŭh đĭ sơnăm ‘nŏh hnam trương iŏk jên au vă tơgŭm ăn rim bôl boăl tơnap tap. Ĭnh hơ iă dêh păng hơpơi ‘mĕh vă hnam trương gô tơgŭm djru rim đe boăl ‘nŏh lơ hlŏh dơ̆ng”.

     Kiơ̆ đơ̆ng ‘nhŏng Trần Doãn Tới, Kơdră chĕp pơgơ̆r jơnŭm Đô̆i dêh char Dak lăk, ư̆h khan lăp tơgŭm djru ăn rim đe ŏh tơnap tap, tơdrong jang au oei tơgop lơ̆m pơtho khan ăn rim bơngai lơ̆m đô̆i, hơ iŏh pơrăm pơkom, hưch hanh hăm tơdrong jang, vei lăng cham char păng đei jơhngơ̆m đon tơgoăt tơgoăl, ‘mêm mơnat dĭh băl, tơgŭm dĭh băl, tơgŭm djru ăn rim bơngai tơnap tap.“Đơ̆ng dôm kĭ hla bơar hŭt păng dôm kơlong đak ‘ngamđe ŏh dônh đei ‘nŏh hlôi tơgop lơ̆m vang tơra dơ̆ng kon jên vă pơjing đei lơ trong jang. Mă ƀar ‘nŏh ‘moi kiơ̆ rim tơdrong jang iĕ lơ lau rim đe ŏh tơgop pơjing đei jơhngơm đon ‘lơ̆ng ăn kơ dĭh păng đơ̆ng nŏh đei jing jơhngơ̆m đon vang iung jang, vang tơgop, băt kơ yuơ tơpôl păng tơgŭm djru ăn rim boăl mơnat tat hlŏh kơ bơ̆n. Lơ ŏh đei sơng iŏk păng sơng iŏk đei tơdrong tơgŭm djru đơ̆ng rim tơdrong jang bơngai hơ iŏh jang tơdrong iĕ, ‘nŏh dôm tơnô̆ kon jên hŏk pơhrăm, rim tơdrong vang tơgŭm djru đơ̆ng khŭl jang Đô̆i lơ̆m hnam trương păng hnam trương anai”.

     Đơ̆ng kon jên mong kơ tơdrong jang Tơdrong jang iĕ, lơ pơbŭng hnam, hơnĭh pơchơt pơ hiơ̆ ăn hơ iŏh, rim hơnĭh jang mâm non hlôi đei tơ iung pơjing tơ̆ Dak Lăk. Tơdrong jang au hlôi hơnhăk đei hơ iă, pơjing rơvơn vang tơgŭm djru ăn đe ŏh tơnap tap đei năm hŏk pơhrăm ‘lơ̆ng.

Tơblơ̆ nơ̆r: Amazưt