VOV4.Bahnar - Đơ̆ng rŏng ƀôh anih đei 7 ‘nu F0 lơ̆m tơ pôl tơ̆ plt Kon Tum, ‘năr 24/10, Dơ nŏ anih vei lăng kon pơ lei dêh char Kon Tum drơ̆ng nơ̆r hăm nơ̆r athei đơ̆ng Anih vei lăng pơ tho pơ hrăm asong ăn hŏk tro tơ̆ plt Kon Tum pơ dơ̆h hŏk atŭm păng tơ chơ̆t pơ jing anih oei hơ drô̆ tơ̆ tơ ring đei jĭ COVID-19 lơ̆m tơ pôl.

Kơ dră chĕp kơ̆l Dơ nŏ anih vei lăng kon pơ lei plt Kon Tum dăr lăng tơ drong jang pơ jing Anih oei hơ drô̆

Kiơ̆ kơ ‘nŏh, pơ tơm đơ̆ng năr ‘nâu, 25/10, đĭ đăng hnam hŏk lơ̆m plt Kon Tum pơ dơ̆h pơ tho hŏk atŭm. Đe ŏh hŏk tro oei tơ̆ hnam hŏk trư̆k tuyê̆n păng hŏk kiơ̆ trong nai mă lăp. Tơ drong năm hŏk dơ̆ng tơ̆ hnam trưng đơ̆ng đe ŏh gô mơ̆ng kiơ̆ tơ drong jĭ COVID-19 lơ̆m plt thoi yơ.

Ƀơm truh anih đei 7 ‘nu F0 ‘nao ƀôh lơ̆m tơ pôl tơ̆ plt Kon Tum, Dơ nŏ anih vei lăng kon pơ lei dêh char Kon Tum hlôi tơ lĕch tơ drong Tơ chơ̆t pơ jing anih oei hơ drô̆ tơ̆ tơ ring đei jĭ tơ̆ Tô 6, phương Quang Trung, plt Kon Tum vă tang găn jĭ COVID-19. Hnam pơ gang plt Kon Tum blŭng a chih đei 113 ‘nu bơ ngai F1, 168 ‘nu bơ ngai F2.

Dơ̆ng: Tơ blơ̆