VOV4.Bahnar - Tam mă truh minh khei dơ̆ng, hloh 1 trĭu bơngai pơlong lơ̆m jâ̆p teh đak gô pơtơm ‘Măng pơlong tôt ngĭp trung hŏk phôh thŏng xơnăm 2021. Truh khei năr âu, dôm tơring lơ̆m jâ̆p teh đak hlôi tơlĕch lơ tơdrong hơmet ăn ‘măng pơlong, lơ̆m noh mă kăl hơtŏk xơnong hăm bơngai chĕp kơ̆l kơ dôm anih pơtho pơhrăm, rim anih jang, khul kơdră tơring, xơkơ̆t hơyak pơgơ̆r minh tơdrong pơlong xơđơ̆ng, tơnăp.

Truh khei năr âu, dôm tơring hlôi pơjing Jơnŭm pơgơ̆r pơlong tôt ngĭp Trung hŏk phôh thŏng xơnăm 2021 kơ dêh char, tơblang hơdăh xơnong jang ăn rim anih jang đei tơrĕk, lơ̆m noh Anih tơm Pơtho Pơhrăm chiu pŭ xơnong chih akŏm dôm tơdrong pơlong mă trŏ ƀlep hăm tơdrong hơbuh hli đơ̆ng pơrang jĭ COVID-19. Minh ƀar tơring nhen Hải Phòng, Đăk Lăk... oei pơjing Jơnŭm pơgơ̆r pơlong tơ̆ apŭng, thĭ xăh, plei tơm vă tơgŭm ăn tơdrong pơgơ̆r pơlong kơ dôm hnam trưng lơ̆m tơring. Lơ̆m khei năr pơrang jĭ hơbuh hli, ‘nguaih kơ dôm anih pơlong tơm, dôm dêh char, plei tơm adoi gô vă pơjing dôm anih pơlong adrô̆ ăn bơngai pơlong oei lơ̆m F1 vă vei xơđơ̆ng xơnong ăn đe oh. Dôm anih pơlong adoi đei hơmet tôm tơmam drăm, anih pơlong păng tơmam drăm tang găn păng tơjră pơrang jĭ.

Ƀok Nguyễn Văn Long, Phŏ Kơdră  Anih tơm Pơtho Pơhrăm dêh char Gia Lai ăn tơbăt, dêh char đei hloh 14 rơbâu bơngai pơlong chih măt, đei pơgơ̆r tơ̆ 39 anih pơlong. Tơring hlôi pơjing trong pơkăp pơlong tôt ngĭp trung hŏk phôh thŏng hăm 4 jăl vă tơjră hăm pơrang jĭ Covid – 19. Dang ei atŭm hăm pơgơ̆r hŏk hơlen ăn hŏk tro, tơring hơtŏk tơdrong tơroi tơbăt, tơtom tơroi ăn kang ƀô̆, bơngai pơtho, bơngai jang păng bơngai pơlong, đe mĕ ƀă băt hơdăh tơdrong hơbuh đơ̆ng pơrang jĭ atŭm hăm chă tơroi ăn dôm anih jang kơpal băt găh tang găn păng tơjră pơrang jĭ: “Anih tơm Pơtho Pơhrăm hlôi pơgơ̆r hăm dôm anih jang tơlĕch jang răh ăn tơdrong pơlong gơh trŏ pơkăp, trŏ tơdrong jang, vei xơđơ̆ng răh tơdrong pơkăl tang găn păng tơjră pơrang jĭ lơ̆m khei năr jĭ Covid hơbuh hli. Lơ̆m noh đei 4 tơdrong pơgơ̆r pơlong hơtŏ hăm 4 jăl vă băt pơrang jĭ hơbuh thoi yơ. ‘Măng pơlong duh oei đei pơgơ̆r trŏ pơkăp atŭm đơ̆ng Anih tơm Pơtho Pơhrăm , Anih jang duh hlôi đei hla bar pơkăl đe hŏk tro năm pơlong, kang ƀô̆ lăng thi păng dôm bơngai vang tơgŭm ăn ‘măng pơlong athei tơroi tơbăt găh y tê̆ adrol 7 năr ƀơ̆t pơgơ̆r pơlong. Đơ̆ng rŏng kơ noh pơtruh tơdrong tơroi tơbăt ăn dôm anih chih măt pơlong, tơring pơlong vă tơblang xek tơlang”

Jing minh lơ̆m dôm tơring đei kơsô̆ bơngai chih măt pơlong tôt ngĭp lơ hloh lơ̆m teh đak, hăm hloh 88 rơbâu bơngai pơlong, ƀok Lê Hoài Nam, Phŏ Kơdră Anih tơm Pơtho Pơhrăm plei tơm Hồ Chí Minh ăn tơbăt, Anih jang hlôi tơlĕch dôm hla bar pơtho pơgơ̆r pơlong truh tôm hnam trưng hŏk lơ̆m tơring, dôm anih pơlong păng hơmet dôm tơmam drăm kăl duh nhen axong bơngai jang ăn ‘măng pơlong, mă jên huach ăn ‘măng pơlong noh lơ hloh yuơ athei vei xơđơ̆ng răh ăn tơdrong tang găn pơrang jĭ: “Nhôn duh hlôi chih akŏm trong jang păng plei tơm duh axong jên mong vă hơmet răt tơmam drăm tang găn păng tơjră pơrang jĭ tơ̆ 160 anih pơlong âu, axong hloh 1 tih răt đak pơgang ôp ti, răt che gom ƀŏ păng vei xơđơ̆ng ăn rim lăm pơlong adoi đei đak pơgang ôp ti, đang kơnoh pơkă hơyuh tô̆ hơkâu jăn, pơm kiơ̆ ƀlep pơkăp “5K”.

Tơ̆ hop akŏm trư̆k tuyê̆n găh tơdrong pơgơ̆r pơlong tôt ngĭp trung hŏk phôh thŏng xơnăm 2021 ‘nao đei Anih tơm Pơtho Pơhrăm pơgơ̆r hăm 63 dêh char, plei tơm ‘nao âu, Khul kơpal kơ Anih tơm Pơtho Pơhrăm xơkơ̆t hơdăh tơdrong hơmet tơnăp đơ̆ng dôm tơring lơ̆m hơmet pơgơ̆r pơlong. Ră hơdăh tơdrong kăp gĭt kơ ‘măng pơlong, Thư̆ trưởng Anih tơm Pơtho Pơhrăm Nguyễn Hữu Độ duh pơkăl dôm jơnŭm pơgơ̆r pơlong kơchăng tơmam drăm, mă kăl noh găh bơngai jang ‘lơ̆ng dơnưp păng tơnăp vă pơgơ̆r ăn ‘măng pơlong gơh xơđơ̆ng, păng trŏ hăm tơdrong pơkăp: “Rơih trŏ bơngai, pơjao trŏ tơdrong jang. Bơ̆n duh iŏk xơnong jang tơm noh pơgơ̆r ‘măng pơlong tơpăt jue, ‘lơ̆ng tơnăp, vei xơđơ̆ng hơtŏ hơnơ̆ng noh rơih trŏ bơngai jing minh tơdrong kăp gĭt hloh. Dôm bơngai đei đon ‘lơ̆ng, gơh rơgei, tơnăp hăm xơnong jang, kơjăp lơ̆mt ơdrong pơgơ̆r păng mă kăl noh rơih đei bơngai chĕp kơ̆l, mă hăt noh tơ̆ dôm hnam trưng pơgơ̆r pơlong, đang kơ noh Khul Kơpal – Kơdră jơnŭm lăng thi, Kơdră châ̆m thi. Mă lei bơngai chĕp kơ̆l mă tơpăt jue noh tơdrong pơlong gô tơnăp ‘lơ̆ng”.

Hơmet ăn tơdrong pơgơ̆r pơlong tôt ngĭp trung hŏk phôh thŏng xơnăm 2021, Anih tơm Pơtho Pơhrăm atŭm hăm dôm tơring hlôi hăt hot hơmet, vei xơđơ̆ng nhen pơkăp. Mă lei khei năr tơjê̆ âu, pơrang jĭ COVID-19 hơbuh hli hlơt. Iŏk yua dôm tơdrong hlôh vao kơ dôm xơnăm adrol ki, Anih tơm Pơtho Pơhrăm atŭm hăm dôm tơring gô pơgơ̆r Pơlong tôt ngĭp trung hŏk phôh thŏng xơnăm âu trŏ nhen tơchơ̆t, mă lei adrô̆ pơgơ̆r ‘măng pơlong tôt ngĭp lơ̆m 2 năr noh năr 7 păng năr 8 khei 7 tơ̆ dôm tơring xơđơ̆ng păng dôm bơngai pơlong ưh đei oei lơ̆m F0, F1, F2. Ƀok Mai Văn Trinh, Kơdră Anih tơm Vei vêr Tơdrong ‘lơ̆ng, Anih tơm Pơtho Pơhrăm ăn tơbăt: “Truh jê̆ khei năr âu, mưh duh oei đei dôm tơring athei oei tơklăh kiơ̆ pơkăp lơ̆m tơpôl kiơ̆ Tơchơ̆t đơ̆ng Thủ tướng teh đak vă tang găn păng tơjră pơrang jĭ COVID-19 noh ‘măng pơlong ăh năr 7 - 8/7/2021 adrô̆ pơgơ̆r ăn dôm tơring xơđơ̆ng păng ăn dôm bơngai pơlong ưh đei oei lơ̆m  F0, F1, F2. Thoi noh, dang Anih tơm Pơtho Pơhrăm gô atŭm hăm dôm tơring pơgơ̆r ‘măng pơlong mă 2 dơ̆ng ăn dôm bơngai mă tam gơh pơlong ăh ‘măng mă mônh”.

Hăm dôm tơdrong jang iŏk bơngai mơ̆t hŏk đăi hŏk, cao đẳng, mă kăl, hăm dôm bơngai xet tuyển mơ̆t hŏk dôm hnam trưng đăi hŏk, cao đẳng hăm trong yua điểm pơlong tôt ngĭp THPT xơnăm 2021, Anih tơm Pơtho Pơhrăm gô pơgơ̆r dôm anih pơtho pơhrăm đăi hŏk hơmet trong iŏk bơngai hŏk, pơdui khei năr, tơchơ̆t iŏk bơngai hŏk vă vei xơđơ̆ng pơyua ăn bơngai hŏk gơh xet tuyển kiơ̆ trong yua điểm pơlong tôt ngĭp THPT xơnăm 2021 kiơ̆ lơ ‘măng phara băl. Anih tơm Pơtho Pơhrăm duh gô chih akŏm đê pơlong ăn dôm ‘măng pơlong phara băl vă vei xơđơ̆ng tơdrong hơtŏ găh tơdrong tơnap vă vei xơđơ̆ng pơyua ăn bơngai pơlong kiơ̆ rim ‘măng phara băl.

Lan chih păng pơre nơ̆r