VOV4.Bahnar - Năr au, năr 26/10, rim kơdră tang măt Kuô̆k hô̆i gô pơma dơnŭh găh Tơdrong vă pơjing Khôi luơ̆t hơmet ming, tơmơ̆t dơ̆ng mĭnh ƀar apăng kơ Khôi luơ̆t pơm tơngla trong tơchăr hơgei. Kiơ̆ đơ̆ng rim kơdră tang măt: ‘Nau jing tơdrong vă jang kăl, kăl đei tơchơ̆t ƀlep hăm rim tơdrong pơkăp apŭng plĕnh tĕh vă Việt Nam vang jang kiơ̆, sơđơ̆ng ăn lei lăi, lăp mĭnh nơ̆r hăm rim khôi luơ̆t đei ƀơm trŭh đei Kuô̆k hô̆i pơjing tơlĕch jang kiơ̆ lơ̆m khei năr au kơnh. Lơ̆m Tơdrong vă pơjing Khôi luơ̆t hơmet ming, tơmơ̆t dơ̆ng Khôi luơ̆t pơm tơngla trong tơchăr hơgei ‘măng mă au tơchơ̆t: pơtĭh gia rim tơdrong đei bơngai ayơ ‘nŏh hyup brŏ, koăy phim vă tĕch mơdro tơmam drăm, mă lei rim khŭl, rim bơngai iŏk yua dôm tơmam au vă iŏk yua sa yuơ ăn kơ dĭh mă lei ư̆h kơ đei apĭnh bơngai tơngla pơjing păng oei kla ăn kon jên ăn bơngai pơjing.Mĭnh ƀar ‘nu kơdră tang măt akhan, Tơdrong vă pơjing Khôi luơ̆t kăl hơmet ming kiơ̆ trong atŏk kơtang bơ̆ jang tơplĭh ‘nao, tơchăr, iung jang kiơ̆ kơtang rim tơdrong jơnei kơ tơdrong jang kmăi kmŏk 4.0 ‘moi kiơ̆ atŏk kơtang iŏk yua păng pơm kiơ̆ tơdrong pơm tơngla tơdrong tơchăr hơgei, tơgŭm ăn tơdrong jang au roi năr roi ‘lơ̆ng hơ iă păng lăp hăm apŭng plĕnh tĕh.

Tơblơ̆ nơ̆r: Amazưt