VOV4.Bahnar -  Lăng akhan pơtôch dăr lăng hơlen, pơ prŏ ming 3 kơ loăi bri tơ̆ Tơdrong tơchơ̆t 100/NQ-HĐND năr 7/12/2017 (jăl jang 2019-2020) ư̆h kơ trŏ, ư̆h kơ lăp hăm trong jang atŏk tơ iung mŭk drăm-tơpôl kơ dêh char, Dơnŏ anĭh vei lăng kon pơlei dêh char Gai Lai pơtrŭh ăn ‘Măng hop akŏm mă 2, Jơnŭm vei lăng kon pơlei dêh char Gia Lai jăl jang ‘nao (2021-2026) lăng hơlen, ‘moi kiơ̆ ‘măng dăr lăng, hơmet ming trong pơ prŏ bri jăl jang 2025, lăng trŭh sơnăm 2030. Kiơ̆ kơ ‘nŏh, pơprŏ bri kơ Gia Lai tơ jur 18.000ha. Mă kăl, hơgăt tĕh bri jang sa đei athei tơmơ̆t dơ̆ng hlŏh 32.000 ha păng ăn hlŏh 44.000 ha lĕch vĕh đơ̆ng pơ prŏ jang găh bri vă tơgŭm ăn atŏk tơ iung mŭk drăm-tơpôl. Groi tĕh bri đei athei lĕch vĕh đơ̆ng pơ prŏ, găh să lơ̆m Tơdrong vă jang Pơnơ̆t đak Ia Mơr kơ apŭng Chư Prông, Pơnơ̆t đak Ia Thul găh apŭng Ia Pa păng Krông Pa păng rim tơdrong vă jang anai nhen pơ prŏ iung jang ŭnh hơyŭh, trong hnam hơvơn tơmơ̆t jên jang, tơmang pơ hiơ̆ ... Đơ̆ng rŏng đei hơmet ming, hơgăt tĕh bri jang sa tơ jur hlŏh 47.200 ha.

Tơblơ̆ nơ̆r: Amazưt