VOV4.Bahnar -  Jĭ hơbŭh Covid-19 hlôi pơm kơnê̆ kơtang trŭh jang sa kơ rim hơnih mơdro sa pơma atŭm păng hơnih mơdro sa dêh char Dak Lăk pơma hơdrô̆. Lơ̆m tơnap tao, lơ hơnĭh mơdro sa găh jang pơm tơlĕch chehphe tơ̆ Dak Lăk hlôi hơnơng tơplĭh nao, vă lăp hăm tơdrong erĭh sa hle. Ƀai chĭh đơ̆ng Hương Lý -bơngai chĭh kơtơ̆ng ang ăn Radiô Nơr Pơma Việt Nam chih tơbăt tơdrong au.

Kŏng ty PM Coffee Dak Lăk tơmơ̆t jên răt kmăi kmŏk pơm tơlĕch tơmam drăm đơ̆ng rŏng đei ƀơm kơnê̆ đơ̆ng jĭ hơbŭh Covid 19

Jĭ Hơnĭh mơdro sa joăt chă hơdrĕng ot chehphe ... ƀok Nguyễn Đình Viên, Kơdră chĕp pơgơ̆r Kŏng ty PM Coffee Dak Lăk tơbăt: Mă đơ̆ng Covid-19 tŏk bŏk pơm ăn tơdrong tech mơdro chehphe rơheng kơkot, mă lei hơnih mơdro sa oei hơnơ̆ng chă răt kmăi kmŏk, hơnơng pơm tơlĕch đei lơ tơmam drăm, atŏk kơtang jang kiơ̆ kơsô̆ vă chă tĕch mơdro tơmam drăm lơ̆m kmăi kmŏk điên tư. Tơdra hơdrol, tơdrong jĭ gô đei tang găn kĕ lơ̆m khei năr kơnh, tơdrong tĕch mơdro gô hrôih đei pơgơ̆r dơ̆ng, kơna Kŏng ty atŏk kơtang pơm tơlĕch lơ tơmam drăm vă tĕch mơdro lơ̆m khei năr Têt trŭh au kơnh.“Jĭ hơbŭh Covid-19 jei tơ ƀơ̆p tôch tơnap tap, rim hơnĭh jang gre chơ pơdŭ tơmam drăm jei pơdơ̆h, nhen lĕ ư̆h kơ đei chă chơ tơmam drăm tơ̆ au tơ̆ to, ‘nŏh nhôn iung jang lơ̆m tơdrong jang tơbăt ăn, atŏk tơ iung hơnăn tơmam drăm. Atŭm hăm ‘nŏh hơdrin pơm tơlĕch đei tơmam drăm ‘lơ̆ng hlŏh dơ̆ng, tĕch mơdro dôm tơmam drăm ‘nao ‘lơ̆ng: chehphe tŭh huch, chehphe ‘lơ̆ng, chehphe ‘lơ̆ng Tây Nguyên”.

Kŏng ty Pơm tơlĕch păng Tĕch mơdro Vương Thành Công+ tơƀô̆h tơbăt tơmam drăm hle

Ƀok Lê Văn Vương, Kơdră chĕp pơgơ̆r Kŏng ty Pơm tơlĕch păng tĕch mơdro Vương Thành Công, pơlei tơm Buôn Ma Thuột tơbăt, mă đơ̆ng tơ jră mŭh măt hăm lơ tơdrong tơnap tap mă lei Kŏng ty oei hơnơ̆ng lui kơ jăp lơ̆ng tơdrong hơ iă tơ̆ hơnăp kơnh. Kơ yuơ lơ lŏh, lơ̆m khei ‘năr pơdơ̆h tĕch mơdro tơmam drăm, kŏng ty hlôi hơnơ̆ng tơ ƀô̆h tơbăt tơmam drăm, tơchă hơnĭh tĕch răt dĭh băl lơ̆m trư̆k tuyên, păng hlôi hơmet đang dang 50 - 60% pơtêng hăm hơdrol. Ƀok Lê Văn Vương tơbăt:“Lơ̆m khei ‘năr jĭ hơbŭh kơtang ‘nŏh kŏng ty Vương Thành Công hlôi hơdrin hŏk pơhrăm, atŏk kơtang hlô̆h vao, pơjing hơyak pran ăn tơdrong jang trŭh au kơnh. Mă 2 nhôn hơdrin tơ ƀô̆h tơbăt tơmam drăm lơ̆m hơniưh tĕch mơdro điên tư, adoi tơ ƀô̆h tơbăt lơ̆m online rim tơmam drăm ‘nao vă atŏk jơhngơ̆m đon lŭ lăp ăn bơngai răt yua”.

        Kiơ̆ đơ̆ng Dơnŏ anih vei lăng Mơdro sa Dak Lăk, đơ̆ng rŏng khei ‘năr pơm kiơ̆ pơvang tang găn tơpôl vă jang kiơ̆ tang găn jĭ hơbŭh, trŭh dang ei, rim hơnĭh mơdro sa dêh char hlôi hơmet pơ ‘lơ̆ng. Lơ hơnĭh mơdro sa sơkơ̆t hơdăh, đơ̆ng rŏng đunh khei ‘năr đei ƀơm kơnê̆ đơ̆ng jĭ hơbŭh Covid-19 pơm ăn ‘nŏh tơdrong tĕch răt hlôi vă tŏk kơtang dơ̆ng. Kơ yuơ lơ lŏh rim hơnĭh mơdro sa tŏk bŏk atŏk kơtang pơm tơlĕch tĕch mơdro, dơ̆ng tơ̆ hơnăp tơdrong răt iŏk kơtang lơ̆m dôm khei vă đĭ sơnăm.

Kiơ̆ đơ̆ng ƀok Phạm Minh Tấn, Kơ iĕng Kơdră chĕp pơgơ̆r Đảng dêh char Dak Lăk: Jĭ hơbŭh Covid-19 hlôi pơm kơnê̆ kơtang truư̆h tơdrong pơm tơlĕch tĕch mơdro tơmam drăm kơ hơnĭh mơdro sa adoi nhen tơdrong erĭh sa kơ kon pơlei. Mă lei, hăm tơdrong hơdrin đơ̆ng Đảng, kon pơlei, trŭh dang ei jĭ hơbŭh lơ̆m dêh char hlôi, tŏk bŏk vei lăng kơ hret, tang găn kĕ ƀiơ̆. Rim tơdrong pơkăp găh mŭk drăm-tơpôl trŭh dang ei oei tŏk pơtêng hăm dôm khei au lơ̆m sơnăm sơ̆. Tŏk mŭk drăm kơ dêh char jơnei dang 5,3%. Thuê̆ ăn hơnĭh mong jên bơ̆ jang Tĕh đak dang 5.500 ti hlak jên, tŏk 3% pơtêng hăm khei au sơnăm sơ̆. Vă jang keh kong rim trong tơlĕch jang sơnăm 2021, dôm khei hơtuch sơnăm, rim hơnĭh đảng, kơdră chĕp pơgơ̆r tơring, rim hơnĭh bơ̆ jang, rim tơring tơrang lơ̆m dêh char oei hơnơ̆ng lăng kơ jăp dôm tơdrong yan au, tơlĕch trong jang, pơgơ̆r jang kiơ̆ hơ iă, jơnei, atŏk kơtang jang tang găn jĭ hơbŭh adoi atŏk tơ iung jang mŭk drăm-tơpôl. Ƀok Phạm Minh Tấn, Kơ iĕng Kơdră chĕp pơgơ̆r Dơnŏ anĭh Đảng dêh char Dak Lăk pơma hơdăh:“Jĭ hơbŭh Covid-19 pơm pơrăm vă jê̆ 2 sơnăm kơ au hlôi pơm kơnê̆ kơtang trŭh tơdrong atŏk tơ iung mŭk drăm-tơpôl, mă lei bơ̆n hơnơ̆ng lăng kơ jăp tơdrong đei yua, sa yuơ ăn kon pơlei păng hơnơ̆ng jang kiơ̆ ƀlep nơ̆r pơrô̆ jang đơ̆ng Trung ương, đơ̆ng Khŭl kơdră Tĕh đak ‘nŏh jang kiơ̆ “2 tơdrong” ‘nŏh mĭnh păh akŏm atŏk tơ iung mŭk drăm-tơpôl, adoi iung jang kơtang hloi tang găn jĭ hơbŭh Covid-19 păng rim tơdrong mơdro sa anai. Ư̆h kơ gơ̆h pơm pơhơi, vă pơjing đei tơdrong hơ iă hlŏh vă kơ bơ̆n akŏm khŭl bơ̆ jang pơm sơđơ̆ng tơdrong jang chĭnh trĭ, atŏk tơ iung mŭk drăm-tơpôl, vei lăng sơđơ̆ng Tĕh đak, tơ iung pơjing tơdrong bơ̆ jang chĭnh trĭ lơ̆m dêh char”.

       Dôm tơdrong hơdrin đơ̆ng hơnĭh mơdro sa tơ̆ Dak Lăk (lơ̆m au đei rim hơnĭh mơdro sa pơm tơlĕch, tĕch mơdro chehphe) iung jang “Pơm joăt hăm tơdrong sơđơ̆ng, ‘lơ̆ng hơ iă” gô tơgop kơtang lơ̆m tơdrong atŏk tơ iung mŭk drăm-tơpôl tơ̆ tơring sơnăm 2021. Đơ̆ng au, mĭnh ‘măng dơ̆ng sơkơ̆t hơdăh hơnih dơ̆ng tơm dơnơm kơ hơnĭh jang chehphe hăm dêh char Dak Lăk pơma hơdrô̆ păng Việt Nam pơma atŭm.

Bơngai chĭh: Hương Lý

Tơblơ̆ nơ̆r: Amazưt