VOV4.Bahnar - Drơ̆ng kiơ̆ nơ̆r krao hơ vơn đơ̆ng Kơ dră AIPA, Kơ dră chĕp kơ̆l Anih chih  pơ jing Luơưt tĕh đak Brunei Darussalam Pehin Dato Abdul Rahman Taib, Khul tang măt ăn Kuô̆k hô̆i Việt Nam yoa Kơ dră Kuô̆k hô̆i Vương Đình Huệ chĕp kơ̆l vang truh hop akŏm Grŭp nghị viện dôm tĕh đak ASEAN ‘măng mă 42 (AIPA-42) kiơ̆ trong trư̆k tuyê̆n, đei pơ gơ̆r đơ̆ng ‘năr 23-25/8/2021 hăm hơ năn “Atŏk tơ iung tơ drong pơ vei jang hơ doi nghị viện lơ̆m tơ drong jang ki thuơ̆t sô̆ năm truh Tơ pôl ASEAN sơ năm 2025”.

‘Nâu jĭ tơ drong tôch gĭt kăl, jĭ tơ drong jang tơ bôl lơ pang ‘măng mă blŭng đơ̆ng Kơ dră Kuô̆k hô̆i Vương Đình Huệ păng Khul tang măt Kuô̆k hô̆i Việt Nam lơ̆m jăl XV. Pơ ‘yoi dơ̆ng dôm tơ drong jơ nei dơ̆ng, tơ̆ Hop akŏm AIPA-42, Kơ dră Kuô̆k hô̆i Vương Đình Huệ vă pơ truh nơ̆r ăn bôl boăl lơ̆m tơ ring păng apŭng plenh tĕh găh 1 tĕh đak Việt Nam hơ nơ̆ng tơ plih ‘nao; Kuô̆k hô̆i Việt Nam jang tơ năp, rơ gei păng kơ chăng mưh jang hơ doi nghị viện lơ pang lơ̆m tơ ring, kơ chăng, rơ gei, vang yak hơ doi hăm Khul kơ dră tĕh đak lơ̆m tơ drong jang atŏk tơ iung mŭk drăm tơ pôl păng tang găn jĭ Covid -19.

Dơ̆ng: Tơ blơ̆