VOV4.Bahnar - Hơ nơ̆ng bơ̆ jang lơ̆m Hop akŏm AIPA mă 42, ‘năr 24/8, pơ gơ̆r hôp anih jang chinh trĭ, Anih jang mŭk drăm păng anih vei lăng tơ pôl. Jơ hôp Anih jang chinh trĭ pơ ma găh 03 tơ drong tơm: hơ tŏk tơ drong sơ đơ̆ng mang păng vei lăng kơ sô̆ năm truh 1 tơ ring mang sơ đơ̆ng ‘lơ̆ng lơ̆m ASEAN; Găh hơ tŏk tơ drong sơ đơ̆ng ăn kon bơ ngai lơ̆m ki thuơ̆t sô̆ jơ̆p lơ̆m ASEAN păng hơ tŏk tơ drong jang tơ bôl nghị viện năm truh Tơ pôl ASEAN. Khul tang măt Kuô̆k hô̆i Indonesia tơ lĕch dơ̆ng tơ drong kăl găh tơ drong tơ gŭm đơ̆ng nghị viện ăn tơ drong Myanmar.  

Jơ hôp Anih jang mŭk drăm: pơ ma 02 tơ drong tơm. ‘Nŏh jĭ găh: Hơ tŏk tơ drong mât jang hơ doi mŭk drăm kơ ASEAN kiơ̆ đơ̆ng chih tơ băt hăm kơ sô̆ ăn dôm anih tĕch mơ dro iĕ păng păh lăp păng jang tơ iung ming dơ̆ng mŭk drăm đơ̆ng rŏng Covid-19: Jang hơ doi găh tơ mang lăng lơ̆m ASEAN. Lơ̆m jơ hôp âu, khul Việt Nam vă tơ lĕch trong jang hơ tŏk ming tơ drong chă tơ mang lăng kiơ̆ trong jang tŏk pran kơ jăp păng sơ đơ̆ng. Tơ chĕng hơ len păng atŏk tơ iung tơ mam chă tơ mang lăng ‘nao pơm lăp hăm tơ drong ‘mĕh vă ‘nao đơ̆ng rŏng kơ jĭ Covid-19.

Jơ hôp anih vei lăng tơ pôl pơ ma găh 3 tơ drong. ‘Nŏh jĭ hơ tŏk tơ drong jang hơ doi păng tưk tơ iung ki thuơ̆t sô̆ vă găn ƀiơ̆ tơ drong ưh ‘lơ̆ng đơ̆ng tŏ ‘mi kial tơ plih; Hơ nhăk dôm tơ drong hơ găt jang tŏk pran kơ jăp lơ̆m plei tĕh vă bơ̆ jang đei yoa ‘lơ̆ng lơ̆m tĕh đak; Hơ năp jang đơ̆ng kơ măy kơ mŏk pơ jing tơ drong hiôk hian ăn kon pơ lei vang năm pôk rơih roi lơ ƀiơ̆.

Dơ̆ng: Tơ blơ̆