VOV4.Bahnar - Pơ gê 9/12, tơ̆ Hà Nội, Anih vei lăng tĕch mơ dro păng jang kơ măy Việt Nam jang hơ doi hăm Khul tĕch mơ dro yoa tơ drong jang tŏk pran kơ jăp Việt Nam pơm lêh roi tơ băt Anih tĕch mơ dro jang xa kơ jăp ‘lơ̆ng tơ̆ Việt Nam. Phó Thủ tướng Vũ Đức Đam, Kơ dră Jơ nŭm jang kơ tĕh đak găh atŏk tơ iung pran kơ jăp păng hơ tŏk kơ sư̆k pơ jei, kơ dră chĕp kơ̆l dôm anih jang tơ̆ Trung ương, kơ dră chĕp kơ̆l dôm anih jang lơ̆m apŭng plenh tĕh tơ̆ Việt Nam vang akŏm.

Hăm hơ năn “Năm truh chăl a nglŏ jang tŏk kơ jăp ‘lơ̆ng ƀiơ̆: ưh đei hơ chăng bu tơ̆ rong”, dôm bơ ngai tang măt akŏm pơ ma nuh găh tơ drong tơ gŭm păng trong jang tŏk, trong jang đunh đai kơ tĕh đak găh jang tŏk rơ gŏh đơ̆ng 2021-2030, jang đei 2 tơ drong tơm ‘nŏh jang tŏk hrĕnh păng kơ jăp lơ̆m chăl a nglŏ ‘nao.

Pơ ma lơ̆m hop akŏm, Phó Thủ tướng Vũ Đức Đam hơ pơi ‘mĕh, dôm anih tĕch mơ dro hơ nơ̆ng jang hơ doi vang bơ̆ jang dôm tơ drong tơ plih ‘nao mă đơ̆ng iĕ bưh vă pơ yoa ăn tơ drong jang tŏk pran kơ jăp. Phó Thủ tướng Vũ Đức Đam pơ ma hơ dăh: Lơ̆m khei ‘năr đei jĭ Covid-19, tơ̆ Việt Nam kŭm nhen dôm tĕh đak nai ăn ƀôh kon pơ lei, rim anih tĕch mơ dro đei ‘mơ ‘met, mong răk ‘nŏh gô đei jơ hngâm pran vă tơ gŭm bơ̆ jang druh kiơ̆ ‘lơ̆ng tơ̆ hơ năp kơnh.

Dơ̆ng: Tơ blơ̆