VOV4.Bahnar - Tơ̆ Hà Nội, Khul drŏ kăn tĕch mơ dro Việt Nam jang hơ doi hăm Anih jang kơ Liên hợp quốc găh Hơ tŏ hơ nơ̆ng păng pơ jao tơ drong chĕp kơ̆l ăn drŏ kăn (UN Women) pơ gơ̆r Hop akŏm đe drŏ kăn tĕch mơ dro Việt Nam 2021 hăm hlŏh 40 anih pơih pơ dăh ƀlep ƀât tơ băt Năr bơ ngai tĕch mơ dro Việt Nam 13/10, Năr drŏ kăn Việt Nam 20/10 păng 20 sơ năm pơ jing Khul drŏ kăn tĕch mơ dro.

Hop akŏm sơ năm ‘nâu đei hơ năn “Tơ plih kơ sô̆: Đơ̆ng đon hlôh vao truh bơ̆ jang”, vă hơ tŏk tơ drong jang mŭk drăm đơ̆ng drŏ kăn kiơ̆ đơ̆ng tơ gŭm ăn anih tĕch mơ dro yoa drŏ kăn chĕp kơ̆l tơ plih ming kơ sô̆, tơ iung dơ̆ng tơ drong jang xa, tĕch mơ dro, lăp hăm tơ drong jang kơ măy kơ mŏk 4.0 hăm tơ drong ƀơm kơ nê̆ đơ̆ng jĭ COVID-19 oei đei lơ̆m apŭng plenh tĕh păng tơ̆ Việt Nam. 

Tơ̆ hop akŏm, tang măt ăn dôm anih tĕch mơ dro vang pơ ma nuh, pơm hơ dăh dôm tơ drong găh tơ plih kơ sô̆ hăm naih tĕch mơ dro, lơ̆m nŏh đei anih tĕch mơ dro yoa drŏ kăn chĕp kơ̆l; dôm tơ mam, kơ măy kơ mŏk kơ sô̆ gơ̆h tơ mât yoa ăn anih tĕch mơ dro lơ̆m khei 'năr đei jĭ COVID-19; trong jang lăp 'lơ̆ng vă tơ plih ming kơ măy sô̆ ăn anih tĕch mơ dro păh lăp păng iĕ; trong pơ gơ̆r jang mưh tơ plih ming kơ măy sô̆ tơ̆ anih tĕch mơ dro...

Dơ̆ng: Tơ blơ̆