VOV4.Bahnar - Lơ̆m 2 năr ‘năr 6 păng 7/10, tơ̆ pơ lei tơm Kon Tum pơ gơ̆r hop akŏm bơ ngai tang măt drŏ kăn dêh char Kon Tum ‘măng mă 14, jăl jang  2021-2026 hăm tơ drong vang akŏm đơ̆ng 182 ‘nu bơ ngai tang măt hloh 115.000 ‘nu bơ ngai jang lơ̆m khŭl drŏ kăn lơ̆m dêh char.

Yă Bùi Thị Hòa, Phŏ Kơ dră Trung ương Khŭl jang vei lăng drŏ kăn Việt Nam asong ăn Hop akŏm um rup đei chih chư “Tơ goăt pôm ƀơ̆r đon - ‘Mêm mơ nat - Hơ gei - Hơ tŏk tơ iung”

Jăl jang âu ki, Khŭl jang vei lăng drŏ kăn dêh char Kon Tum hlôi ưh kơ đei pơ dơh tơ plih ‘nao tơ drong tơm, trong jang iŏk đei lơ jơ nei lơ̆m rim tơ drong jang pơ jei băl... Rim kơ dră Khŭl jang lơ̆m dêh char kŭm đei lơ trong jang hơ iă iŏk đei jơ nei ‘lơ̆ng, thoi noh tơ drong pơ jing 24 “Plei drŏ kăn kon kông tơ ring tơ rang ‘nao”; man ‘nao, hơ met ming 65 tŏ hnam tơ nŏ ‘mêm kơ eng ăn kơ 65 unh hnam bơ ngai jang lơ̆m khŭl, drŏ kăn đei tơ drong arih sa mơ mat tat hloh hăm akŏp kơ sô̆ jên hloh 2 ti hlak jên; pơ jing 60 tơ drong jang hơ dai hăm hloh 1.000 ‘nu bơ ngai jang lơ̆m khŭl....

Drơ̆ng kiơ̆ tơ drong tơ chơ̆t Hop akŏm

Hop akŏm bơ ngai tang măt drŏ kăn dêh char Kon Tum ‘măng mă 14, jăl jang 2021-2026 hlôi pôk 33 ‘nu tang măt lơ̆m Khŭl chĕp kơ̆l pơ gơ̆r jăl jang ‘nao. Yă Y Phương pôk pơm dơ̆ng Kơ dră Khŭl jang vei lăng drŏ kăn dêh char Kon Tum jăl jang 2021-2026.

Thuem: Tơ blơ̆