VOV4.Bahnar - Ƀlep ƀât tơ băt 76 sơ năm Kăch mang khei 8 păng Quốc khánh 2/9 (1945 - 2021), pơ gê (31/8), Hnam hŏk Hồ Chí Minh păng dôm kơ dră chĕp kơ̆l Đảng (Hnam hŏk chinh trĭ quốc gia Hồ Chí Minh) jang hơ doi hăm Anih Gru groa ƀok Kơ dră Hồ Chí Minh tơ̆ Anih jang kơ ƀok Kơ dră tĕh đak pơ gơ̆r Hop akŏm khoa hŏk kiơ̆ trong trư̆k tuyê̆n đei hơ năn: “Ƀok Hô hăm jơ hngâm đon hơ pơi ‘mĕh rơ ngei, hiôk hian”. Đĭ jơ hnơr Ƀok Hô adrin, plang jơ hngâm yoa dôm tơ drong gĭt kăl hlŏh kơ hơ drĕch hơ drung păng kon bơ ngai, lơ̆m nŏh mă loi jĭ đon hơ pơi rơ ngei hiôk hian.

Lơ̆m hop akŏm, Phó Giáo sư, Tiến sỹ Lê Văn Lợi, Phŏ Kơ dră Hnam hŏk Chính trị Quốc gia Hồ Chí Minh pơ ma hơ dăh, hrei ‘nâu, đĭ đăng đảng, đĭ đăng kon pơ lei, đĭ đăng khul linh akŏm jơ hngâm jang kiơ̆ tơ drong Tơ chơ̆t đơ̆ng ‘măng hop akŏm mă 13 kơ Đảng, hơ tŏk tơ drong hŏk pơ hrăm păng jang kiơ̆ jơ hngâm đon ‘lơ̆ng đơ̆ng Ƀok Hô, bơ̆ jang pran kơ jăp vă tang găn đĭ tơ drong jĭ Covid-19, vei lăng jơ hngâm pran kon pơ lei.

Dơ̆ng: Tơ blơ̆