VOV4.Bahnar - Pơ gê 9/11, tơ̆ Hà Nội, Anih vei lăng mŭk drăm Trung ương pơ gơ̆r hŏk akŏm “Đon tơ chĕng păng trong jang ‘nao bă bơ̆ jang kơ măy kơ mŏk ‘nao truh sơ năm 2030 trong vă jang truh sơ năm 2045”.

Hop akŏm tơ blang hơ dăh, roi tơ băt lơ tơ drong lơ̆m chăl hle păng dôm trong jang tih đơ̆ng jang hăm kơ măy kơ mŏk ‘nao lơ̆m apŭng plenh tĕh păng tơ̆ tơ ring, đơ̆ng nŏh lăng ƀôh păng tơ lĕch dôm đon tơ chĕng păng trong jang ‘nao găh jang kơ măy kơ mŏk, hŏk pơ hrăm kơ măy kơ mŏk, trong jang găh kơ măy lơ̆m apŭng plenh tĕh, ƀai hŏk kăl ‘măn ăn Việt Nam kŭm nhen dôm ƀai hŏk kăl đơ̆ng apŭng plenh tĕh găh iung jang xa păng tơ plih ‘nao rơ gei vă bơ̆ jang tơ iung ming dơ̆ng đơ̆ng rŏng kơ jĭ Covid-19;

Hơ len năng rim hla ar chih tơ roi găh jang atŏk tơ iung kơ măy kơ mŏk 2020 păng tơ blang, tơ lĕch trong jang ăn Việt Nam, mă loi ‘nŏh lơ̆m tơ drong jang kơ măy pơm tơ mam; trong klăih song jên jang vă hơ tŏk jơ hngâm pran, đei yoa ăn tơ drong jang mŭk drăm, hơ tŏk hrĕnh tơ drong jang hăm kơ măy kơ mŏk ‘nao kơ tĕh đak.

Dơ̆ng: Tơ blơ̆