VOV4.Bahnar - Pơ gê ‘năr 8/10, Hnam trưng Đại học Kinh tế - Đại học Quốc gia Hà Nội jang hơ dai hăm hnam trưng Đại học Hải Phòng, hnam trưng Đại học Thương mại păng Khŭl vei lăng anih jang mŭk drăm Hải Phòng pơ gơ̆r Hop akŏm khoa hŏk hăm hơ năn “FDI jơ̆p plei teh păng tơ jră tơ drong tơ plih đơ̆ng anih jang mơ dro sa FDI tơ̆ Việt Nam lơ̆m khei ‘năr ‘nao”. Kiơ̆ kơ tơ̆ng ang tơ̆ hop akŏm, jên FDI jơ̆p peli teh pơ ma atŭm păng FDI lơ̆m Việt Nam pơ ma hơ drô̆ hlôi păng tŏk bŏk pŭ ƀơm ưh kơ ‘lơ̆ng kơ tang đơ̆ng jĭ hơ buh COVID 19. Mă lei jên tơ mơ̆t jang kơ tă đơ̆ng teh đak đe lơ̆m teh đak bơ̆n lơ̆m 9 khei sơ năm ‘nâu oei đei hloh 22 ti đô lar Mi, tŏk 4,4% pơ têng hăm khei ‘nâu sơ năm sơ̆. ‘Nâu jĭ 1 jơ nei ‘lơ̆ng, tơ ƀôh đon lui đơ̆ng rim bơ ngai tơ mơ̆t jên jang, rơ̆ih Việt Nam jing anih năm truh hơ iă vă pơm tơ lĕch, tĕch mơ dro. Mă đơ̆ng thoi noh ră, rim bơ ngai tang măt kŭm tơ blang hơ dăh dôm tơ drong ưh tam mă ‘lơ̆ng lơ̆m tơ drong sơng iŏk FDI đơ̆ng teh đak bơ̆n lơ̆m khei ‘năr âu ki nhen: Tơ drong ‘mê̆ ‘mach cham char, ưh kơ pŭn ai ưh kơ sơ đơ̆ng unh hơ yuh, sơ đơ̆ng jên hu đơ̆ng 1,2 tơ drong jang FDI. Găh trong jang sơng đei FDI chăl hle tơ̆ hơ năp kơnh, rim bơ ngai tang măt akhan, teh đak bơ̆n kăl đei dôm trong jang tơ gŭm ‘lơ̆ng, đei tơ drong pơ jei băl, vă sơng đei dôm bơ ngai tơ mơ̆t jên jang tơ drong jang.

Thuem: Tơ blơ̆