VOV4.Bahnar - Atŏk kơtang dăr lăng păng vei lăng kơ hret bơngai mơ̆t vă tang găn jĭ Covid-19 mơ̆t tơpŏh lơ̆m tĕh đak bơ̆n. ‘Nŏh jing 1 lơ̆m dôm twodrong jang kăl hlŏh tơ̆ hop akŏm pơgê năr 14/4 mă Khŭl kơdră Dơnŏ anĭh chĕp pơgơ̆r Tĕh đak athei rim hơnĭh bơ̆ jang păng rim dêh char, pơlei tơm jang kiơ̆’. Kơ iĕng Thủ tướng Vũ Đức Đam, Kơdră chĕp pơ Dơnŏ anĭh chĕp pơgơ̆r tĕh đak tang găn jĭ Covid-19 pơm tơm hop akŏm. Khŭl kơdră Dơnŏ anĭh chĕp pơgơ̆r Tĕh đak sơkơ̆t hơdăh, pơrang jĭ Covid-19 tŏk bok pơrăm kơtang tơ̆ rim tĕh đak lơ̆m tơring nhen Campuchia, Thái Lan, Malaysia… đei ƀơm kơtă hloi trŭh tơdrong bơ̆ jang tang găn jĭ kơ tĕh đak bơ̆n. Khei năr au kăl hơvơn vang iung jang kơtang kơ yuơ trŭh au kơnh ‘nŏh jơ ‘năr pơdơ̆h lê̆h 30/4, năr 1/5, tơdrong ‘mĕh vă chă năm au to kơ kon pơlei tôch kơtang. Kiơ̆ đơ̆ng Thượng tướng  Nguyễn Văn Sơn, Kơ iĕng Kơdră chĕp pơgơ̆r Dơnŏ anĭh tơm Kŏng ang tơbăt, kăl iung jang kơhret vei lăng kơ jăp dôm bơngai mơ̆t lơ̆m tĕh đak, tơklep hăm hơnăp jang kơtang kơ Dơnŏ anĭh vei lăng kon pơlei rim dêh char, pơlei tơm, mă kăl ‘nŏh hăm bơngai đei hơnĭh mơdro sa krao hơvơn dơ̆ng pang tang măt. Kơ iĕng Thủ tướng Vũ Đức Đam pơma hơdăh, hơnơ̆ng xek tơlang kơhret rim bơngai mơ̆t klĕnh lơ̆m tĕh đak bơ̆n.

Tơblơ̆ nơ̆r: Amazưt