VOV4.Bahnar - ‘Năr 22/4, tơ̆ plt Đà Lạt, Dơ nŏ anih vei lăng kon pơ lei dêh char Lâm Đồng păng Anih tang măt ăn Ấn Độ tơ̆ plt Hồ Chí Minh pơ gơ̆r hop akŏm “Tơ drong ‘lơ̆ng vă tơ mât jên jang tơ̆ Lâm Đồng păng jang hơ doi hăm Ấn Độ găh choh jang xa”.

Lơ̆m hop akŏm, tang măt ăn kơ dră chĕp kơ̆l dêh char, ƀok Phan Văn Đa, Phŏ Kơ dră vei lăng kon pơ lei dêh char Lâm Đồng pơ ma hơ dăh, hrei ‘nâu dôm anih jang, unh hnam kon pơ lei lơ̆m dêh char oei jang xa, tĕch mơ dro lơ tơ mam ‘lơ̆ng, lơ̆m nŏh đei lơ tơ mam đei chih tơ băt đơ̆ng Anih vei lăng đon rơ gei Việt Nam ƀơk ăn hla ar tơ mam ‘lơ̆ng nhen ‘nhot, pơ kao, hla che, chĕh phe păng lơ tơ mam nai hai.

‘Nâu jĭ tơ drong ‘lơ̆ng vă dôm anih jang kơ pal Lâm Đồng, khul tĕch mơ dro lơ̆m dêh char hơ tŏk tơ drong roi tơ băt, pơih xă tơ drong tĕch mơ dro, jang hơ doi hăm dôm tĕh đak lơ̆m apŭng plenh tĕh, lơ̆m nŏh đei Ấn Độ - 1 anih tĕch mơ dro mă dang ei Lâm Đồng oei tôch tơ rĕk vă chă trong tĕch mơ dro hăm băl.

Dơ̆ng: Tơ blơ̆