VOV4.Bahnar - Pơgê năr 6/12, Thủ tướng Tĕh đak Phạm Minh Chính vang năm păng iung pơma chĕp pơgơ̆r hop akŏm khŭl kơdră kơpal ‘măng mă pêng găh Jang kmăi kmŏk 4.0 hăm hơnăn “Hơmet pơ ‘lơ̆ng păng atŏk tơ iung mŭk drăm-tơpôl kơ jăp khei ‘năr jĭ hơbŭh Covid -19 păng atŏk kơtang jang hăm kmăi kmŏk lơm chăl jang kmăi kmŏk kơsô̆” ‘moi kiơ̆ trong pơgơ̆r kơtă păng trư̆k tuyên kơ yuơ Dơnŏ anĭh bơ̆ jang Mŭk drăm Trung ương chĕp pơgơ̆r.

Hop akŏm khŭl kơdră ‘măng mă au jing tơdrong pơgơ̆r gĭt kăl hlŏh găh chĭnh trĭ, mŭk drăm-tơpôl, tơgop tơlĕch jang kiơ̆ Tơdrong tơchơt Pơm lê̆h hop akŏm Kơdră tang măt lơ̆m tĕh đak ‘măng mă XIII kơ Đảng păng pơtrŭh dôm trong kơnăl ăn tơ iung pơjing trong bơ̆ jang hăm kmăi kmŏk hơgei kơ tĕh đak jăl jang trŭh sơnăm 2030, lăng trŭh sơnăm 2045. Adoi jing tơdrong pơgơ̆r tơgŭm ăn pơchŏh trong trong jang kăl păng trong jang hơmet ming, atŏk tơ iung mŭk drăm-tơpôl chăl khei ‘năr jĭ hơbŭh Covid-19 kiơ̆ Nơ̆r pơma pơtôch đơ̆ng Hop akŏm Trung ương 4 Jăl XIII păng Nơ̆r pơrô̆ jang đơ̆ng Thủ tướng Tĕh đak.

Tơblơ̆ nơ̆r: Amazưt