VOV4.Bahnar -Pơgê năr 17/5, tơ̆ Hnam Kuô̆k hô̆i, kơ yuơ Kơ iĕng Kơdră chĕp pơgơ̆r Kuô̆k hô̆i, Kơ iĕng Kơdră Jơnŭm vei lăng Pôk rơ̆ih tĕh đak, Kơdră Hơnĭh jang hơlen măt bơngai kơdră Trần Thanh Mẫn chĕp pơgơ̆r, Hơnĭh bơ̆ jang hơlen măt bơngai kơdră kơ Jơnŭm vei lăng Pôk rơ̆ih tĕh đak pơgơ̆r hop akŏmvă mơ̆ng păng ăn tơgop nơ̆r găh pơtôch bơ̆ jang kơ Hơnĭh jang hơlen măt bơngai Kơdră kơ Jơnŭm vei lăng Pôk tơ̆ih Tĕh đak đơ̆ng năr pơjing trŭh dang ei. Iung pơma tơ̆ Hop akŏm, Ƀok Trần Thanh Mẫn tơbăt, rim bơ̆ jang hơmet ăn pôk rơ̆ih hlôi păng iung jang ƀlep hăm tơdrong tơlĕch ăn. Năr au, năr 18/5, Jơnŭm vei lăng Pôk rơ̆ih Tĕh đak gô pơgơ̆r Hop akŏm trư̆k tuyên lơ̆m tĕh đak, ‘măng hop akŏm vă drơ̆ng mĭnh nơ̆r dôm tơdrong chĭh tơbăt đơ̆ng Hơnĭh jang hơlen măt bơngai kơdră vă tơroi tơbăt ăn Jơnŭm vei lăng Pôk rơ̆ih Tĕh đak. Kơ iĕng Kơdră chĕp pơgơ̆r Kuô̆k hô̆i, Kơ iĕng Kơdră Jơnŭm vei lăng Pôk rơ̆ih tĕh đak, Kơdră Hơnĭh jang hơlen măt bơngai kơdră Trần Thanh Mẫn pơma hơdăh, ‘nau ‘măng hop akŏm mă 2 kơ hơnĭh au, ‘măng hop akŏm gô pơgơ̆r tơgop nơ̆r, pơma dơnuh lơ̆m rim tơdrong tơm lơ̆m khei ‘năr kơnh.

Tơblơ̆ nơ̆r: Amazưt