VOV4.Bahnar -  Pơgê năr 27/12, tơ̆ Hà Nội, Anih jang trung ương Măt trâ̆n tôh kuôk Việt Nam pơgơ̆r Hop akŏm trư̆k tuyê̆n 'măng mă 11 Khul Kơdră Anih jang Trung ương Măt trâ̆n tôh kuôk Việt Nam jăl 9.  Pơma ăh hop akŏm, Kơdră Anih jang Trung ương Măt trâ̆n tôh kuôk Việt Nam Đỗ Văn Chiến xơkơ̆t, tơdrong jang kơ Măt trâ̆n tôh kuôk Việt Nam xơnăm 2021 đei lơ tơdrong hiôk mă lei duh athei tơjră hăm lơ tơnap tap, mă hăt noh tơdrong răm tih tên đơ̆ng pơrang jĭ Covid-19. Dôm tơdrong đei jơnei đơ̆ng anih jang Măt trâ̆n tôh kuôk dôm jăl jang tơgăl kơ pôm bơnê. Găh xơnong jang tơm kơ xơnăm 2022, Kơdră Anih jang Trung ương Măt trâ̆n tôh kuôk Việt Nam Đỗ Văn Chiến ră hơdăh, Anih juăt jang hlôi pơgơ̆r chih akŏm pơkăp hơdăh, akŏm lơ̆m 3 tơdrong jang tơm. Mă mônh noh, hơtŏk pơ 'lơ̆ng tơdrong jang pơma xa lơ̆m tơpôl. Mă ƀar noh tơlĕch lơ trong jang vă tơmơ̆ng, akŏm nơ̆r tơgop đơ̆ng kon pơlei vă tơtom pơtruh nơ̆r hăm Đảng păng Teh đak. Mă pêng noh hơtŏk tơdrong jang pơma đam atŭm vă pơjing jơhngơ̆m pran kơ tôm anih jang Măt trâ̆n tôh kuôk  đơ̆ng Trung ương truh tơ̆ tơring.  

 Lan chih păng pơre nơ̆r