VOV4.Bahnar - Tơ̆ hnam Kuô̆k hô̆i, Kơ dră Kuô̆k hô̆i Vương Đình Huệ păng Kơ dră Kuô̆k hô̆i tĕh đak CHDCND Lào Xay-xổm-phon Phôm-vi-hản vang pơ gơ̆r hop akŏm pơ ma nuh găh tơ drong jang đơ̆ng Kuô̆k hô̆i Việt Nam păng Kuô̆k hô̆i Lào.

Hop akŏm jĭ tơ drong jang vă tơ ƀôh hơ dăh dôm tơ drong jang hơ doi, pơ ma nuh găh tơ drong jang đơ̆ng 2 Kuô̆k hô̆i lơ̆m tơ drong chih pơ jing luơ̆t, dăr lăng, tơ chơ̆t dôm tơ drong gĭt kăl kơ tĕh đak. Lơ̆m jăl jang âu ki, Kuô̆k hô̆i 2 tĕh đak pơ gơ̆r 08 hop akŏm găh tơ drong jang, lơ̆m nŏh đei 04 Hop akŏm yoa Kơ dră Kuô̆k hô̆i 2 tĕh đak vang pơ gơ̆r. Kơ dră Kuô̆k hô̆i Vương Đình Huệ akhan, kiơ̆ đơ̆ng dôm hop akŏm, Kuô̆k hô̆i 2 tĕh đak roi tơ băt ăn băl lơ tơ drong kăl lơ̆m rim tơ drong jang.

‘Moi kiơ̆ tơ drong jơ nei âu, Hop akŏm pơ ma nuh găh tơ drong jang đơ̆ng Kuô̆k hô̆i Việt Nam păng Kuô̆k hô̆i Lào akŏm pơ ma găh tơ drong apinh jet păng tơl nơ̆r apinh jet tơ̆ Hop akŏm Kuô̆k hô̆i Việt Nam păng ƀai hŏk kăl đei chih iŏk đơ̆ng Kuô̆k hô̆i Việt Nam lơ̆m tơ drong set hơ len, tơ chơ̆t dôm tơ drong jang gĭt kăl kơ tĕh đak, tôch kăp gĭt hăm tơ drong jang atŏk tơ iung mŭk drăm tơ pôl kơ tĕh đak.

Dơ̆ng: Tơ blơ̆