VOV4.Bahnar - Kơ sơ̆ 1/04, tơ̆ Hà Nội, Anĭh jang kơ Kuô̆k hô̆i pơ gơ̆r hop akŏm pơ tôch jăl jang kơ Kuô̆k hô̆i 14 đơ̆ng Grŭp ngĭ si jang tơ bôl Việt Nam- Liên bang Nga.

Pơ ma lơ̆m hop akŏm, Kơ dră Grŭp ngĭ si jang tơ bôl Việt Nam- Liên bang Nga ƀok Phan Xuân Dũng, Vei lăng Anih jang khoa hŏk, kơ măy kơ mŏk păng cham char kơ Kuô̆k hô̆i ăn tơ băt, lơ̆m jăl jang âu ki Kuô̆k hô̆i jăl 14, kŭm hăm dôm tơ drong jang tơ bôl đơ̆ng Đảng, Tĕh đak, tơ drong jang đơ̆ng Grŭp ngĭ si jang tơ bôl Việt Nam – Liên bang Nga kŭm tơ gop ưh đei tŏ sĕt kiơ vă hơ tŏk tơ drong pơ vei ‘lơ̆ng hơ iă đơ̆ng 2 tĕh đak, tơ iung hơ năp jang đơ̆ng khul jang tơ bôl ngĭ viê̆n pơ ma atŭm păng ngĭ si jang tơ bôl pơ ma adrô̆.

Bơ ngai tang măt tôm tơ drong ăn Liên bang Nga tơ̆ Việt Nam kŭm pơ ma hơ dăh, tơ drong jang đơ̆ng Grŭp ngĭ si jang tơ bôl Việt Nam- Liên bang Nga khei ‘năr âu ki vang tơ gop tôch ‘lơ̆ng, tưk tơ iung tơ drong jang hơ doi đơ̆ng Việt Nam păng Liên bang Nga lơ̆m lơ tơ drong jang pha ra băl.

Dơ̆ng: Tơ blơ̆