VOV4.Bahnar  – Tơ̆ Hop akŏm pơma đam 'măng mă 3, 100% bơngai tang măt drơ̆ng nơ̆r chih hơnăn 205 'nu bơngai đơ̆ng anih jang tơ̆ Trung ương đei tôm pơkăp lĕch măt tơgar jang tang măt ăn Kuôk hô̆i jăl 15. Hop akŏm yuơ Anih jang Trung ương Măt trâ̆n tôh kuôk Việt Nam pơgơ̆r ăh pơgê năr 15/4, tơ̆ Hà Nội. Đơ̆ng rŏng kơ pơtôch Hop akŏm pơma đam 'măng mă 2, kiơ̆ kơsô̆ pơkăp đơ̆ng Jơnŭm pơgơ̆r pôk rơih kơ teh đak, kơsô̆ bơngai đei chih hơnăn akŏm tơ̆ Trung ương păng tơring noh 1.093 'nu. Lơ̆m noh, Trung ương đei 205 'nu, tơring noh 888 'nu păng đei 75 'nu kơdih lĕch măt tơgar. Thoi noh lơ̆m 2,19 'nu lĕch măt tơgar gô đei 1 'nu tang măt ăn kuôk hô̆i đei pôk. Tơ̆ hop akŏm, rim bơngai tang măt kiơ̆ đơ̆ng pơkăp jang tang măt ăn Kuôk hô̆i, iŏk nơ̆r tơgop đơ̆ng kon pơlei tơ̆ tơring oei xa hăm bơngai lĕch măt tơgar vă tơblang, pơtruh lơ nơ̆r kăp gĭt. Rim bơngai tang măt pơkăp pơm hơdăh tơdrong pơtruh bơngai lĕch măt tơgar jang tang măt ăn Kuôk hô̆i jăl 15. Pơma ăh Hop akŏm, Ƀĭ thư Trung ương Đảng, Kơdră Anih jang Trung ương Măt trâ̆n tôh kuôk Việt Nam Đỗ Văn Chiến ră hơdăh: Hop akŏm pơma đam 'măng mă 3 jing minh tơdrong kăp gĭt ăn tơdrong pôk rơih, âu jing hop akŏm pơma đam mă hơtuch đĭ đăng, vă chih hơnăn dôm bơngai tôm pơkăp pơtruh ăn jơnŭm pơgơ̆r pôk rơih kơ teh đak, vă tơlĕch jang kiơ̆ pơkăp pơtoi.

Lan chih păng pơre nơ\r