VOV4.Bahnar - Tơ băt 100 sơ năm năr rơ neh kơ ƀok Lê Quang Đạo (8/8), pơ gê hei (7/8), Học viện Chính trị Quốc gia Hồ Chí Minh jang hơ dai hăm Anih tơ roi tơ băt kơ Trung ương, Anih bơ̆ jang Kuôk hô̆i păng Anih jang Đảng dêh char Bắc Ninh pơ gơ̆r hop akŏm khoa hŏk kơ teh đak hăm hơ năn “ Ƀok Lê Quang Đạo hăm kach mang Việt Nam păng pơ lei pơ la Bắc Ninh”. Tơ drong arih sa păng tơ drong jang đơ̆ng ƀok Lê Quang Đạo tơ klep hơ dai hăm dôm tơ drong tơ plih tih tên păng gĭt kăl kơ teh đak lơ̆m hloh 60 sơ năm hơ tuch a nglŏ 20. Yak hloh lơ tơ drong jang, mă đơ̆ng tơ̆ kơ chư̆k jang kiơ, lơ̆m khei ‘năr hơ yơ, ƀok ling lang đĭ jơ hngơ̆m, jang tơ năp hăm tơ drong jang, jang đang hơ gei hơ năp jang đei pơ jao. Hăm hơ năp jang ‘noh jĭ Kơ dră Kuôk hô̆i, ƀok hlôi tơ gop ‘lơ̆ng hơ nhăk trong yak tơ plih ‘nao đơ̆ng Đảng lơ̆m tơ drong tơ plih ‘nao bơ̆ jang đơ̆ng kuôk hô̆i, mă loi ‘noh jĭ tơ drong tŭn pran tơ drong jang pơ jing khôi luơ̆t tơm teh đak vă pơm ‘lơ̆ng rim tơ drong tơ chơ̆t đơ̆ng Đảng, pơm lăp hăm ‘mĕh vă vei lăng teh đak hăm khôi luơ̆t.

Thuem: Tơ blơ̆