VOV4.Bahnar - Anih vei lăng găh Jŏh ayŏ păng pơ tho pơ hrăm kơ Kuôk hô̆i ‘nao jang hơ dai hăm Anih tơm vei lăng găh Joh ayŏ,Tơ plŏng kơ dâu păng Tơ mang lăng dêh char Nghệ An pơ gơ̆r Hop akŏm “Tơ mang lăng Việt Nam – tơ iung ming dơ̆ng păng jang tŏk”. Pơ ma pơ gơ̆r Hop akŏm, Phŏ kơ dră Kuôk hô̆i Trần Thanh Mẫn pơ ma hơ dăh, hơ tŏk tơ iung tơ drong jang tơ mang lăng ‘noh jĭ 1 trong jang tih đơ̆ng Đảng, Teh đak bơ̆n. Jĭ hơ buh Covid-19 pơ dui đunh 2 sơ năm hlôi ƀơm ưh kơ ‘lơ̆ng tôch kơ tih truh tơ drong hơ tŏk tơ iung mŭk drăm - tơ pôl kơ teh đak, lơ̆m noh đei anih jang tơ mang lăng. Yua đơ̆ng ƀơm kơ nê̆ đơ̆ng jĭ hơ buh, truh dang ei, teh đak bơ̆n tam mă đei sơng tơ moi tơ mang lăng apŭng plĕnh teh, tơ moi tơ mang lăng lơ̆m teh đak hơ nơ̆ng tơ jur hloh 42% pơ têng hăm khei ‘nâu sơ năm hơ drol; akŏp thu iŏk đơ̆ng tơ moi tơ mang lăng jô̆ pơ hlom jur vă jê̆ 50%. 

Hop akŏm “Tơ mang lăng Việt Nam – tơ iung ming dơ̆ng păng jang tŏk”

Hop akŏm hơ nơ̆ng pơm hơ dăh hloh tơ drong pơ vei đơ̆ng tơ drong jang tơ iung ming dơ̆ng mŭk drăm - tơ pôl atŭm kơ lơ̆m teh đak hăm rim tơ drong jang, trong tơ lĕch jang, trong vă jang tơ iung ming dơ̆ng, jang tŏk tơ mang lăng; apĭnh dôm trong jang, tơ drong tơ gŭm, mă loi ‘noh dôm trong jang tơ gŭm găh vei sơ đơ̆ng tang găn jĭ vă pơ̆ih ‘măng sơ đơ̆ng; rim trong jang tơ gŭm hơ tŏk ‘lơ̆ng tơ drong kĕ pơ jei đơ̆ng tơ mang lăng Việt Nam lơ̆m khei ‘năr plơ̆ng.

Thuem: Tơ blơ̆