VOV4.Bahnar - Pơgê năr 16/12 tơ̆ Hà Nội, Dơnŏ anĭh tơm vei lăng Chŏh jang sa păng Atŏk tơ iung tơring tơrang jang hơdoi hăm Tơdrong jang atŏk tơ iung Liên Hợp quốc tơ̆ Việt Nam păng Hơnĭh mong jên atŏk tơ iung chŏh jang sa apŭng plĕnh tĕh pơgơ̆r Hop akŏm Tơdrong jang Tơgŭm djru apŭng plĕnh tĕh sơnăm 2021. Hop akŏm jing ‘măng pơma dơnŭh trong jang kơdră kơpal đei pơgơ̆r rim sơnăm ƀar păh Dơnŏ anĭh tơm vei lăng Chŏh jang sa păng Atŏk tơ iung tơring tơrang hăm tơpôl rim bơngai tơmơ̆t jên jang apŭng plĕnh tĕh, grŭp jang mơdro sa, khŭl jang hơdoi vă vang pơma dơnŭh, tơbăt dĭh băl trong bơ̆ jang, tơlĕch jang kiơ̆ kơ ƀar pang vă atŏk kơtang jang hơdoi kơ jăp apŭng plenh tĕh, atŏk kơtang jang hơdoi rim trong jang vă pơtrŭt kơtang chŏh jang sa Việt Nam kiơ̆ trong kơ jăp ‘lơ̆ng păng tôm tong. Hăm hơnăn “Jang hơdoi ‘lơ̆ng hơ iă ăn mĭnh tơdrong chŏh jang sa hle”, hop akŏm gô pơma dơnŭh Tơdrong vă jang kăl atŏk tơ iung chŏh jang sa, tơring chŏh jang sa kơ jăp ‘lơ̆ng jăl jang 2021-2030, lăng trŭh sơnăm 2050 păng Trong pơ prŏ iung jang tĕh đak kơ Việt Nam găh phe ƀa tơmam drăm sa kơ jăp ‘lơ̆ng jăl jang 2021-2030.

Tơblơ̆ nơ̆r: Amazưt