VOV4.Bahnar - Tơ̆ Hà Nội ‘năr 8/12, Anih chĕp kơ̆l kanh sat đak dơ sĭ Việt Nam pơ gơ̆r Hop akŏm trực tuyến dôm bơ ngai chĕp kơ̆l Kanh sat đak dơ sĭ rim teh đak Châu Á ‘măng mă 17 hăm tơ drong vang akŏm đơ̆ng dôm bơ ngai chĕp kơ̆l khŭl linh kanh sat đak dơ sĭ/ jang kiơ̆ khôi luơ̆t lơ̆m đak dơ sĭ găh 20 teh đak, 1 tơ ring teh, 1 anih jang apŭng plĕnh teh păng 3 ‘nu bơ ngai tang măt hơ len lăng. ‘Nâu jĭ hop akŏm ‘măng mă blŭng đei pơ gơ̆r hăm trong trực tuyến. ‘Nâu jĭ tơ drong jang đei yua, tơ gop ‘lơ̆ng ăn tơ drong pơ trŭt păng hơ tŏk loi dơ̆ng jang hơ dai đơ̆ng rim khŭl linh jang kiơ̆ khôi luơ̆t tơ̆ Châu Á, yua kơ tơ drong tơm păng đei yua atŭm ăn tơ drong vei sơ đơ̆ng, rơ ngei păng hơ tŏk tơ iung tơ ring đak dơ sĭ lơ̆m tơ ring păng apŭng plĕnh teh. Hop akŏm pơ gơ̆r hăm 2 ‘măng lơ̆m tơ drong jang tơ bôl, rơ hau, lui ngeh păng tơ păt. ‘Nâu jĭ tơ drong hiôk vă khŭl linh kanh sat đak dơ sĭ rim teh đak chă hơ len lăng, băt hơ dăh păng pơ trŭt rim tơ drong jang hơ dai ‘lơ̆ng hloh dơ̆ng vă vang hơ dai băl hơ met pơ ‘lơ̆ng dôm tơ drong jang kiơ̆ khôi luơ̆t đak dơ sĭ. Tơ drong vang tơ gŭm hơ met pơ ‘lơ̆ng dôm tơ drong tơ hli vei sơ đơ̆ng ưh kơ ƀiơh đei, dôm long nol ‘nao đei lơ̆m đak dơ sĭ athei hơ tŏk loi dơ̆ng jang hơ dai đơ̆ng rim teh đak găh vei sơ đơ̆ng lơ̆m đak dơ sĭ.

Thuem: Tơ blơ̆