VOV4.Bahnar - Pơ gê ‘năr 6/1 tơ̆ Anih jang kơ Khŭl kơ dră teh đak, pơ gơ̆r Hop akŏm trực tuyến pơ tôch tơ drong jang vei lăng sơ đơ̆ng trong nơ năm sơ năm sơ̆, tơ lĕch jang trong jang, hơ năp jang sơ năm ‘nâu. Bơ ngai jang lơ̆m Anih tơm Chĭnh trĭ, Phŏ Thủ tướng Phạm Bình Minh, Kơ dră Anih jang vei lăng sơ đơ̆ng trong nơ năm kơ teh đak pơ gơ̆r Hop akŏm. Kiơ̆ tơ roi tơ băt tơ̆ hop akŏm, sơ năm sơ̆ kanh sat trong nơ năm lơ̆m teh đak hlôi phak hloh 2,8 triệu ‘nu pơm glăi, phak jên vă jê̆ 3 rơ bâu ti hlak jên, iŏk hloh 248 rơ bâu hla ar huơ̆r gre, rôp gơ̆t hloh 460 rơ bâu tong gre rim kơ loăi.

Pơ ma tơ̆ hop akŏm, Phŏ Thủ tướng Phạm Bình Minh pơ ma hơ dăh hăm tơ drong vei lăng jĭ covid 19 păng vih hơ lơ̆k dơ̆ng arih sa hmă ‘nao, rim tơ drong jang găh gre kơ dâu lơ̆m sơ năm ‘nâu gô vih hơ lơ̆k hmă dơ̆ng păng tŏk hloh dơ̆ng, yua thoi noh, Phŏ Thủ tướng athei, rim Anih tơm, anih jang tơ ring kăl kơ tơ chĕng hơ len, tơ lĕch nơ̆r athei rim trong jang tơ jur gre tơ̆m pơ̆k preh băl 1 trong đei yua tơ̆ hơ năp kơnh.

Thuem: Tơ blơ̆