VOV4.Bahnar - ‘Năr brei (6/8) pơ gơ̆r Hop akŏm trư̆k tuyê̆n pơ ma nuh găh tơ drong roi tơ băt păng tơ drong kăl đei chih răk đơ̆ng Đảng Cộng sản Việt Nam păng Đảng Cộng sản Chile. Ƀok Lê Hoài Trung, Kơ dră jang lơ̆m Trung ương Đảng, Kơ dră Anih jang tơ bôl kơ Trung ương Đảng bơ̆n păng ƀok Claudio de Negri, Bí thư Trung ương Đảng, Kơ dră Anih jang tơ bôl kơ Trung ương Đảng Cộng sản Chile vang pơ gơ̆r hop akŏm.

Tơ̆ hop akŏm, ƀok Lê Hoài Trung pơ ma hơ dăh Đảng Cộng sản Việt Nam ling lang năng kăl, hơ pơi ‘mĕh pơm hơ tŏk păng hơ met pơ ‘lơ̆ng hlŏh dơ̆ng tơ drong pơ vei, 1 ƀơ̆r đon, ‘lơ̆ng hơ iă đơ̆ng sơ̆ hăm Đảng Cộng sản Chile. Lơ̆m tơ drong pơ ma nuh, dôm bơ ngai tang măt ăn 2 đảng roi tơ ƀôh lơ ƀai chih tơ blang găh tơ drong kăl mưh bơ̆ jang tơ iung pơ jing đảng, bơ̆ jang kiơ̆ trong kon pơ lei pơm tơm; tơ drong kăl mưh bơ̆ jang atŏk tơ iung mŭk drăm, tơ pôl păng mât jang hơ doi hăm apŭng plenh tĕh hrei ‘nâu; tơ lĕch trong jang tôch rơ đăh vă pơm hơ tŏk hlŏh dơ̆ng tơ drong pơ vei, jang hơ doi đơ̆ng 2 đảng, 2 tĕh đak lơ̆m khei ‘năr truh.

Dơ̆ng: Tơ blơ̆